Qańtar oqıǵasyna qatysty 83 adam bas bostandyǵynan aıyrý jazasyna kesildi

NUR-SULTAN. QazAqparat – Bıyl qańtardaǵy oqıǵalarǵa qatysty 349 kúdikti qamaýda otyr. Bul týraly QR Bas prokýratýrasy Qylmystyq qýdalaý qyzmeti basshysynyń orynbasary Eldos Qılymjanov málim etti, dep habarlaıdy QazAqparat tilshisi.

«8 óńirde 30 myńnan astam tergeý júrgizildi. 4 myńnan asa sot saraptamasy taǵaıyndaldy. Mindetti tergeý áreketteri qylmystarǵa ár qatysýshysynyń rólin anyqtaý, onyń áreketterin obektıvti baǵalaý jáne zańdy protsestik sheshim qabyldaý úshin jasalady. Qazirgi ýaqytta 349 kúdikti qamaýda otyr», - dedi Eldos Qılymjanov Ortalyq kommýnıkatsııalar qyzmetinde.

Onyń aıtýynsha, kúdiktilerdiń ǵımarattardy órteýge, qarýdy jymqyrýǵa, memlekettik nysandarǵa jáne quqyq qorǵaý organdary qyzmetkerlerine qarýly shabýyl jasaýǵa belsendi túrde qatysqandyǵy anyqtalǵan. Árbir qamaýǵa alynǵan adam boıynsha olardyń qylmystarǵa qatystylyǵy týraly jetkilikti málimetter bar.

Jalpy, qańtar oqıǵalary boıynsha sotqa 479 qylmystyq is joldanyp, olar boıynsha 545 adam isti boldy.

Eldos Qılymjanovtyń sózine qaraǵanda, qańtar oqıǵasyna qatysty Qazaqstanda 83 adam naqty bas bostandyǵynan aıyrý jazasyna kesildi. Olar bılik ókilderine qatysty kúsh qoldanǵany, múlikterdi zaqymdaýǵa baılanysty aýyr qylmystardy jasaǵandary, zalaldy ótemegeni úshin jaýapqa tartyldy.

Budan buryn habarlanǵandaı, qazirgi kezde arnaıy prokýrorlardyń is júrgizýinde jappaı tártipsizdikter boıynsha 53 jáne terrorızm aktilerine qatysty 32 qylmystyq is bar .

Memlekettik obektilerdi órtteý, múlikterdi joıý jáne terrorızm aktileri Almaty, Shymkent qalalarynda, Aqtóbe, Atyraý, Almaty, Jambyl, Qyzylorda jáne Shyǵys Qazaqstan oblystarynda jasalǵany belgili boldy.