Qańtar oqıǵasyna qatysqan atyraýlyqtyń birine sot úkimi shyqty
Atyraý qalasyndaǵy №2 sotta kúsh qoldaný arqyly jappaı tártipsizdikke qatysqany (QR Qylmystyq kodeksiniń 272-babynyń 2-bóligi) jáne jappaı tártipsizdik kezinde adamdar toby bolyp, bılik ókiline qatysty ómirine nemese densaýlyǵyna qaýipti kúsh qoldanǵany úshin aıyptalǵan (2022 jylǵy 11 shildedegi ózgeriske deıingi Qylmystyq kodekstiń 380-babynyń 3-bóliginiń 4,8-tarmaqtary) D.E.-ge qatysty qylmystyq is qaraldy.
«2022 jylǵy 5 qańtarda saǵat 14:30 shamasynda D.E. Atyraý oblysynyń ákimdigi ǵımaratynyń aldynda uıymdastyrylǵan jappaı tártipsizdikke qatycqan. Polıtsııa qyzmetkeri R.E.-ge qatysty kúsh qoldanyp jatqan adamdar tobyn kórip, sol qolynyń judyryǵymen jábirlenýshiniń bet tusyna bir ret soqqy jasap, ómiri men densaýlyǵyna qaýipti emes kúsh qoldanǵan», -dep habarlady №2 sottyń baspasóz qyzmeti.
Sot talqylaýy kezinde sottalýshynyń qylmystyq áreketiniń saralanýy ózgertilip, prokýrormen QR Qylmystyq kodeksiniń 272-babynyń 2-bóligi (Kúsh qoldaný arqyly jappaı tártipsizdikke qatysý), 380-babynyń 1-bóligi (Bılik ókiline qatysty ómirine nemese densaýlyǵyna qaýipti emes kúsh qoldaný) boıynsha jańa aıyptaý aktisi jasaqtalǵan. Osyǵan baılanysty basty sot talqylaýy Qylmystyq kodekstiń 272-babynyń 2-bóligi, 380-babynyń 1-bóligimen (2022 jylǵy 11 shildedegi ózgeriske deıingi) jańa aıyp boıynsha jalǵastyrylǵan. Sottalýshy óziniń kinásin moıyndap, is boıynsha jınaqtalǵan dáleldemelerdi daýlamaıtynyn kórsetip, kináni moıyndaý týraly protsestik kelisimdi jasaýdy suraǵan.
Sot tergeýi barysynda prokýrordyń, sottalýshy, onyń qorǵaýshysynyń qatysýymen jáne jábirlenýshiniń kelisimimen kináni moıyndaý týraly protsestik kelisim jasaqtalǵan.
Sottalýshyǵa jaza protsestik kelisimge sáıkes taǵaıyndaldy.
«Sot úkimimen D.E.-ge QR Qylmystyq kodeksiniń 380-babynyń 1-bóligimen 1 jyl merzimge bas bostandyǵyn shekteý jazasy, 272-babynyń 2-bóligi boıynsha 4 jyl bas bostandyǵynan aıyrý jazasy taǵaıyndaldy. 2022 jylǵy 2 qarashadaǵy Raqymshylyq jasaý týraly zańy negizinde D.E. QR Qylmsytyq kodeksiniń 380-babynyń 1-bóligimen taǵaıyndalǵan bas bostandyǵyn shekteý túrindegi jazadan bosatyldy. Al, 272-babynyń 2-bóligimen taǵaıyndalǵan 4 jyl bas bostandyǵynan aıyrý jazasy tórtten úsh bóligine, ıaǵnı 1 jylǵa deıin qysqartylyp, 63-babynyń negizinde 1 jyl merzimge shartty jaza taǵaıyndaldy», -dep málim etti sottyń baspasóz qyzmetinen.
Sot úkimi zańdy kúshine engen joq.
Eske sala ketelik, budan buryn Qańtar oqıǵasyna qatysqan 27 atyraýlyq kinásin moıyndaǵanyn jazǵan edik.
