Qańtar oqıǵasyna qatysqan atyraýlyqtyń biri tergeý ızolıatoryna qamaýǵa alyndy
Atyraý oblystyq qylmystyq ister jónindegi mamandandyrylǵan aýdanaralyq sotynda qańtar oqıǵasyna qatysqan 27 adamnyń qylmystyq isi qaralyp jatyr. Sottalýshynyń biri A. Qoıanbaevqa QR Qylmystyq kodeksi 272-babynyń 2-bóligimen aýyr sanattaǵy qylmystyq quqyq buzýshylyq jasady degen negizben aıyp taǵylǵan.
«Sottalýshy A. Qoıanbaev 3 qazanǵa taǵaıyndalǵan basty sot otyrysynyń bolatyn ýaqyty men orny týraly habarlama ala tura sot otyrysyna kelmedi. Sot otyrysyna kelmeý sebebin habarlamady. Sottalýshynyń sotqa kelmeý sebebin anyqtaý úshin úzilis jarııalandy. Sot otyrysy hatshysynyń jáne advokatynyń birneshe ret shalǵan qońyraýyna A. Qoıanbaev jaýap bermedi. Tek sottalýshy M. Naryshovtyń qońyraýyna jaýap berip, aýyryp jatqanyn habarlaǵan. Al, 3 qazandaǵy narkologııalyq anyqtamaǵa sáıkes sottalýshy A. Qoıanbaevtyń masań kúıde ekeni anyqtaldy», - dedi sottyń baspasóz qyzmeti.
Osyǵan baılanysty oblystyq qylmystyq ister jónindegi mamandandyrylǵan aýdanaralyq soty 3 qazandaǵy qaýlysy negizinde A. Qoıanbaevqa qoldanylǵan úıqamaq túrindegi bultartpaý sharasyn ózgertti. Sottalýshyǵa kúzetpen ustaý túrindegi bultartpaý sharasy qoldanylady.
Eske sala ketelik, buǵan deıin Qańtar oqıǵasyna qatysqan 27 atyraýlyqtyń isine qatysty sot 19 qyrkúıekte ótetinin habarlaǵan bolatynbyz.
