Qańtar oqıǵasyna qatysqan 27 atyraýlyqtyń isine qatysty sot úkimi shyqty
Atyraý oblysynyń qylmystyq ister jónindegi mamandandyrylǵan aýdanaralyq sotynda QR Qylmystyq kodeksiniń 272-babynyń 2,3-bólikterimen, 188-babynyń 1-bóligimen, 191-babynyń 3-bóliginiń 3-tarmaǵymen, 200-babynyń 2-bóliginiń 1-tarmaǵymen, 200-babynyń 4-bóligimen, 380-babynyń 3-bóliginiń 1,4,8-tarmaqtarymen, 380-1-babynyń 2-bóliginiń 6-tarmaǵymen, 287-babynyń 4-bóligimen, 291-babynyń 4-bóliginiń 2-tarmaǵymen, 28-babynyń 5-bóligimen, 291-babynyń 4-bóliginiń 2-tarmaǵymen (2022 jylǵy 11 shildedegi ózgeriske deıin) aıyptalǵan 27 adamǵa qatysty qylmystyq is qaraldy.
«Sottalýshylardyń biri S. 2022 jylǵy 4 qańtarda WhatsApp qosymshasy arqyly Atyraý turǵyndaryn bılik ókilderiniń zańdy talaptaryna belsendi túrde baǵynbaýǵa, jappaı tártipsizdikke shaqyrǵan. Al, D. 2022 jylǵy 4 qańtarda polıtsııa qyzmetkerine kúsh qoldanǵan. 2022 jylǵy 5 qańtarda oblys ákimdigi ǵımaratynyń aldynda sottalýshylar A., A., B., D., K., M., B., Sh., Ý., G., D., S., B., E., J., I., I. jáne N. polıtsııanyń zańdy talaptaryna baǵynbaı, olarǵa qatysty kúsh qoldanyp, quqyq qorǵaý organdary qyzmetkerleriniń densaýlyǵyna zııan keltirip, kúsh qoldanýmen, qıratýmen, buzýmen, múlikti joıýmen ulasqan jappaı tártipsizdikke qatysqan. Sottalýshylar Q., S., H., B., N., T., T. polıtsııa qyzmetkerleriniń zańdy talaptaryna baǵynbaı, kúsh qoldanýmen, qıratýmen, buzýmen, múlikti joıýmen ulasqan jappaı tártipsizdikke qatysqan. Sottalýshylardyń kinási jábirlenýshilerdiń, kýálardyń aıǵaqtarymen, ózderiniń moıyndaý jaýaptarymen, oqıǵanyń barysy túsirilgen beınejazbalarmen jáne saraptama qorytyndylarymen dáleldendi», -dep habarlady atalǵan sottyń baspasóz qyzmeti.
Sot talqylaýy barysynda sottalýshylardyń is-áreketteri aýyr jáne aýyrlyǵy ortasha qylmystyq quqyq buzýshylyqtarǵa baılanysty qaıta saralanǵan. Prokýror jańa aıyptaý aktisin usynǵan.
Sottalýshylar is boıynsha jınaqtalǵan dáleldemelerdi daýlamaıtyn kórsetip, kináni moıyndaý týraly protsestik kelisim jasaýdy suraǵan. Sot tergeýi barysynda prokýrordyń, sottalýshylar men olardyń qorǵaýshylarynyń qatysýymen, jábirlenýshilerdiń kelisimimen kináni moıyndaý týraly protsestik kelisim jasaqtalǵan.
«26 sottalýshynyń jazasyn aýyrlatatyn mán-jaılar anyqtalmady. Sottalýshy I.-ǵa QR Qylmystyq kodeksiniń 55-babynyń 4-bóliginiń normasyn qoldanýmen 3 jyl merzimge bas bostandyǵyn shekteý jazasy taǵaıyndalyp, onyń áreketinde qylmystyń qaıtalanýy tanyldy. Al, 26 sottalýshyǵa qatysty 2022 jylǵy 2 qarashadaǵy «Raqymshylyq jasaý týraly» Qazaqstan Respýblıkasy zańy qoldanyldy. Onyń ishinde 2 sottalýshy Raqymshylyq zańyna, 17 sottalýshy jazasyn óteýine baılanysty qylmystyq jaýaptylyqtan bosatyldy. 7 sottalýshyǵa bas bostandyǵynan aıyrýmen baılanysty emes jaza taǵaıyndaldy. Barlyq sottalýshylar sot zalynan bosatyldy», -dep málim etti sottyń baspasóz qyzmetinen.
Sot úkimi zańdy kúshine engen joq.
Budan buryn qańtar oqıǵasyna qatysqan atyraýlyqtyń birine sot úkimi shyqqanyn jazǵan edik.
