Qańtar oqıǵasy: Túrkistan oblysynda 6 qylmystyq is sotqa joldandy
Jalpy, Túrkistan oblysy polıtsııa departamenti tergeýshileriniń, sondaı-aq qala, aýdandyq polıtsııa bólimsheleriniń is júrgizýinde qańtar oqıǵasy kezinde tirkelgen 17 qylmystyq is bolǵan. Olardyń ishinde tonaý, buzaqylyq, zańsyz qarý saqtaý, esirtki zattaryn saqtaý, bótenniń múlkin qasaqana joıý, kórineý jalǵan aqparat taratý isteri tirkelgen.
«Tergeýshiler aýqymdy ári tyńǵylyqty jumystardy júrgizdi. Tártip saqshylary 20-dan astam kúdiktini ustap, qamaýǵa aldy. Olardyń ishinde Almaty qalasyndaǵy jappaı tártipsizdikterge qatysqan 14 turǵyn blokposta ustaldy. Tergeýshiler qylmys oryn alǵan aýmaǵyna qaraı 14 kúdiktige qatysty 8 qylmystyq isti Almaty qalasynyń Polıtsııa departamentine joldady. Al, 6 qylmystyq is boıynsha jınalǵan materıaldar aıyptaý aktisimen birge sotqa joldandy» - deıdi, Túrkistan oblysy polıtsııa departamenti bastyǵynyń orynbasary Asyljan Qaldarbekov.
Polıtsııa polkovnıgi kúdiktilerdiń qalaı qolǵa túskenderinde aıtyp berdi. Máselen, qańtar oqıǵasynan keıin Túrkistan qaoasynyń Yntymaq blok-beketinde tártip saqshylary ishinde eki jolaýshysy bar «Yutong» markaly avtokólikti toqtatqan. Olardan 3 uıaly telefon, 5 fotoapparat, noýtbýk, 11 altyn buıym, jańa kıim men aksessýarlar, sondaı-aq 200 myń teńgeden astam aqsha tárkilendi. Kúdiktilerdiń aıtýynsha, olar tárkilengen múlikti Almaty qalasyndaǵy kóshelerdiń birinde ornalasqan turmystyq tehnıka dúkeni men zergerlik dúkennen jappaı tártipsizdikterge qatysý barysynda urlaǵan. Atalǵan jaıtty polıtseıler QR QK-niń 191-baby 2-bóligi «Tonaý» boıynsha tirkedi. Kúdiktiler qamaýǵa alynǵan. Atalǵan jaıt boıynsha sotqa deıingi tergeý materıaldary Almaty qalasynyń prokýratýrasyna joldandy.
Sol kúni jedel-izdestirý is-sharalaryn júrgizý kezinde Shardara polıtsııa bóliminiń polıtseıleri Túrkistan oblysy boıynsha UQKD qyzmetkerlerimen birge Shymkent qalasyndaǵy tártipsizdikterge qatysqan jergilikti turǵyndy ustaǵan. Tintý kezinde jedel ýákilder ustalǵan adamnyń úıinen jalpy salmaǵy shamamen 9 keli bolatyn marıhýana esirtkisin, IJ avtomatyn, 30 patron men 3 jınalmaly pyshaqty tapqan. Atalǵan derek, QR QK-niń 296-babynyń 4-bóligi «Esirtki, psıhotroptyq zattarmen, sol tektestermen ótkizý maqsatynsyz zańsyz jumys isteý» men QK-niń 274-baby 4-bóligi «Kórineý jalǵan aqparat taratý» boıynsha tirkeldi.
Kúdikti qamaýǵa alyndy. Sotqa deıingi tergeý materıaldary aıyptaý aktisimen birge Shardara aýdanynyń sotyna jiberilgen.
