Qańtar oqıǵasy: Tarazda balasymen birge tutanǵysh qospalar taratqan kúdikti ustaldy

TARAZ. QazAqparat – Jambyl oblysynda «qańtar oqıǵasy» kezinde tutanatyn qospasy bar bótelkelerdi taratty degen kúdikpen er adam ustaldy, dep habarlaıdy QazAqparat tilshisi.

Qańtar aıynyń 5-inen 6-syna qaraǵan túni saǵat 20:00 shamasynda Taraz qalasynyń Qazybek bı kóshesinde sur tústi Mitsubishi Diamante avtokóligi toqtaıdy.

«Avtokólikte kele jatqan adamdar odan memlekettik tirkeý nómirlik belgisin alyp, júksalǵyshqa salady. Bul kóliktiń júrgizýshisi bes lıtrlik tutanǵysh qospany alyp, ulymen birge ony shyny bótelkelerge quıyp, sherýge qatysýshylarǵa taratqan.

Atalǵan derekke qatysty QR Qylmystyq kodeksiniń 255-baby 4-bóligi (Terrorızm aktisi) boıynsha sotqa deıingi tergeý amaldary bastaldy», - delingen polıtsııa departamentiniń habarlamasynda.

Jedel-izdestirý sharalaryn júrgizý kezinde polıtsııa qyzmetkerleri Almaty oblysynyń 44 jastaǵy turǵynyn anyqtap, ustady. Kúdikti tergeý ızolıatoryna qamaýǵa alyndy, tergeý amaldary júrgizilýde.