Qańtar oqıǵasy: Taldyqorǵanda 2 polıtseı sottaldy

TALDYQORǴAN. QazAqparat – Taldyqorǵanda qańtar oqıǵasynda ızolıatorǵa qamalǵan «kúdiktini» óltirip alǵan polıtseı 10 jylǵa sottaldy. Al, osy faktini jasyrǵan áriptesine 4 jylǵa bas bostandyǵyn shekteý jazasy taǵaıyndaldy, dep habarlaıdy QazAqparat tilshisi.

Taldyqorǵan qalalyq sotynda abaısyzda jábirlenýshiniń ólimine ákep soqqan azaptaý faktisi boıynsha (146-baptyń 3-bóligi 2022 jylǵy QK redaktsııasynda), sondaı-aq qylmysty jasyrý boıynsha (QK 432-baby) qylmystyq isi qaraldy.

Anyqtalǵanyndaı, 2022 jyldyń 8 qańtarynda polıtsııa basqarmasynyń qyzmetkerleri «jappaı tártipsizdikterge qatysqan» degen kúdikpen jábirlenýshi M.-ny ýaqytsha ustaý ızolıatoryna (ÝUI) jetkizgen. ÝUI ǵımaratynda óziniń qyzmettik mindetterin atqarǵan sottalýshy B. jábirlenýshige jaraqat keltirip, ol aýrýhanada qaıtys bolǵan. Ekinshi sottalýshy S. osy aýyr qylmys faktisin jasyrǵan.

Taraptardyń ustanymy boıynsha, prokýror B.-ny 11 jylǵa bas bostandyǵynan aıyrýdy, S.-ny 3 jylǵa bas bostandyǵynan aıyrýdy surady.

Jábirlenýshiniń ókilderi prokýrordy qoldady.️ Sottalýshy B. kinásin moıyndamady, sottan ózin aqtaýdy surady. S. kinásin moıyndap, ókindi.

«Aıyptalýshylardyń kinási is boıynsha jınalǵan dáleldemelermen, kýágerlerdiń aıǵaqtarymen, sot saraptamalarynyń qorytyndylarymen dáleldendi. Sot úkimimen B. QK-niń 146-babynyń 3-bóligi boıynsha kináli dep tanyldy jáne oǵan 10 jyl merzimge bas bostandyǵynan aıyrý jazasy taǵaıyndaldy. S.-ǵa QK-niń 432-baby boıynsha 4 jyl merzimge bas bostandyǵyn shekteý jazasy taǵaıyndaldy», - delingen Jetisý oblystyq soty baspasóz qyzmetiniń habarlamasynda.

Sondaı-aq, sottalǵandardan jábirlenýshilerdiń paıdasyna 15 mln teńge somasynda moraldyq zııan óndirildi.

Sot úkimi zańdy kúshine engen joq.