Qańtar oqıǵasy: Shymkent qalasyna 4 mlrd teńgeden astam shyǵyn kelgen

ShYMKENT. QazAqparat - Qańtar oqıǵasy kezinde Shymkentte búlingen nysandar qalpyna keltirilip jatyr, dep habarlaıdy QazAqparat tilshisi.

Qańtar aıynda bolǵan jappaı tártipsizdikterden Shymkent qalasyna 4 mlrd teńgeden astam shyǵyn kelip, 190 adam túrli jaraqatpen aýrýhanaǵa túsken. Onyń ishinde 71 adam polıtsııa qyzmetkerleri men ásker sarbazdary. Bul týraly qala ákimi Murat Áıtenov Prezıdent Joldaýyn júzege asyrý boıynsha ótken aktıv otyrysynda aıtty.

«Syndarly sátterde halyqqa qorǵan bolyp, jaǵdaıdyń ýshyǵyp ketpeýine jol bermegen kúshtik qurylymdardyń qyzmetkerlerine jáne qoǵamdyq tártipti qorǵaýǵa shyqqan eriktiler men sol ýaqytta kómektesken barsha kásipkerlerge alǵys aıtyp, rızashylyǵymdy bildiremin. Búginde búlingen nysandardy qalpyna keltirý jumystary júrgizilýde»,-dedi qala ákimi.

Tártipsizdik saldarynan qalada 8 memlekettik jáne 29 bıznes nysan zardap shekti. 90 arnaıy kólikter zaqymdalyp, onyń ishinde 40 kólik janyp ketken. Qarapaıym adamdardyń da birqatar múlki jaramsyz bolyp qalǵan.

Qala ákimi qańtar oqıǵasynyń zardabyn joıý jumystaryn odan ári jalǵastyryp, «Qazaqstan halqyna» qorymen birlese jumys isteý kerektigin aıtyp, sala mamandaryna tapsyrmalar berdi.