Qańtar oqıǵasy: ShQO-da 700-den astam beınejazba tekserilýde
ÓSKEMEN. QazAqparat – Shyǵys Qazaqstan oblysynda qańtar oqıǵasyna qatysty 700-den astam beınejazba tekserilýde, dep habarlaıdy QazAqparat tilshisi.
ShQO prokýratýrasy baspasóz qyzmetiniń málimetine súıensek, prokýratýra basshylyǵy qańtar oqıǵasyna qatysqany úshin ustalǵan adamdardyń múddelerin qorǵaıtyn advokattarmen kezdesý ótkizdi.
«Búginde Óskemen jáne Semeı qalalaryndaǵy vedomstvoaralyq jedel-tergeý toptarynyń quqyqqa qarsy is-áreket faktileri boıynsha arnaıy prokýrorlardyń basshylyǵymen 12 qylmystyq is (jappaı tártipsizdikterge qatysý, bılik ókilderine qatysty kúsh qoldaný, oq-dárilerdi, esirtki quraldaryn zańsyz saqtaý, arnaıy tehnıkany aıdap áketý, terrorızm aktileri boıynsha) tergelýde. Atalǵan qylmystardy jasady degen kúdikpen 130 azamat ustaldy. Sot barlyǵyna qatysty qamaýǵa alý sanktsııasyn shyǵardy», - delingen aqparatta.
Qamaýǵa alynǵan 30 adamnyń, onyń ishinde 1 kámeletke tolmaǵan jáne 5 áıeldiń densaýlyq jaǵdaıyn, asyraýynda kishkentaı balalarynyń bolýyn jáne basqa da jeńildetetin mán-jaılardy eskerip, sot jáne prokýror bultartpaý sharasyn úıqamaqqa alýǵa aýystyrdy.
«Advokattarmen kezdesýde qylmystyq isterdi tergeýdiń aldyn ala nátıjeleri aıtyldy. Tergeý toptary oqıǵa oryndarynda 170-ten astam tekserý jáne tintý jumystaryn júrgizdi. «Sergek» kameralary, Jedel basqarý ortalyqtarynan jáne uıaly telefondardan 700-den astam beınejazba alynyp, tekserilýde. 634 sot-medıtsınalyq, taýartaný, órt-tehnıkalyq, qurylys, ballıstıkalyq, trassologııalyq jáne basqa da saraptamalar taǵaıyndaldy», - delingen habarlamada.
