Qańtar oqıǵasy: Semeıde búlikshiler «TIGR» arnaıy áskerı kóligin basyp alǵan

NUR-SULTAN. QazAqparat – Semeıde áskerılerge tıesili «TIGR» arnaıy kóligin basyp alýǵa qatysqan kúdiktilerdiń biri ustaldy. Bul týraly QR Іshki ister mınıstrligi Tergeý departamentiniń bastyǵy Sanjar Ádilov aıtty, dep habarlaıdy QazAqparat tilshisi.

«Qazirgi ýaqytta ishki ister organdary tergeýshileriniń óndirisinde 2 548 qylmystyq is bar. Qylmys jasady degen kúdik boıynsha ýaqytsha ustaý abaqtysyna 887 adam ustalyp, onyń 789-y qamaýǵa alyndy. Olardyń 205-i - buryn qylmystyq jaýapkershilikke tartylǵan, 8-i - izdeýde júrgen adamdar», - dedi ol Ortalyq kommýnıkatsııalar qyzmetindegi brıfıng barysynda.

Onyń atap ótýinshe, kúdiktilerdiń kinási alynǵan zattaı dáleldemelermen, beınebaqylaý kameralarynyń jazbalarymen, kýálardyń aıǵaqtarymen jáne basqalarmen dáleldenedi.

«Mysaly, Semeı qalasynda ákimshilikti jáne áskerılerge tıesili «TIGR» arnaıy kólik quralyn basyp alýǵa qatysýshylardyń biri ustaldy. Kúdiktiniń kinási onyń uıaly telefonynan tabylǵan beınejazbamen dáleldendi. Ol ýaqytsha ustaý abaqtysyna jabylyp, sot sanktsııasymen qamaýǵa alyndy. Tergeý organdary aýyr jáne asa aýyr qylmys jasaǵan adamdardy ǵana ustaıtynyn taǵy da atap ótemin. Aýyrlyǵy az qylmystar boıynsha – qamaýǵa alýmen baılanysty emes bultartpaý sharalary qoldanylady», - dedi Sanjar Ádilov.