Qańtar oqıǵasy: Polıtseıler men áskerılerge shabýyldaǵan sát túsirilgen jańa vıdeo jarııalandy

NUR-SULTAN. QazAqparat – Jelide Almatyda qarý ustaǵan buzaqylardyń polıtseıler men áskerılerge taıaq pen armatýramen shabýyl jasaǵan vıdeosy paıda boldy, dep habarlaıdy QazAqparat.

Kadrda toptasqan búlikshilerdiń polıtseıler men áskerılerdi qorshap alǵany beınelengen. Olardyń formasy men pogonyn julyp alyp, soqqyǵa jyqqan. Áskerılerdiń qalqany men basqa da qarýlaryn tartyp alǵan.

«Sarbazdy bári jabylyp uryp jatyr. Taıaqpen, aıaqpen», - dep pikir bildirdi vıdeo avtory.

Áskerı qyzmetshiniń qany sorǵalap aqqan sarbazdy alańnan áketip bara jatqanyn kórýge bolady. Vıdeoǵa taǵy bir áskerıdiń jaraqat alǵan sáti túsip qalǵan. Túnge qaraı buzaqylar men búlikshiler shoqparmen jáne qalqanmen qyzmettik avtokólikterdi qırata bastaǵan. Radıkaldardyń qarýly toby barlyq áınekterdi qıratyp, mashınalardyń ústine sekirip, ákimshilik ǵımarattardy jaqqan.

Eske salaıyq, 1 qańtarda Mańǵystaý oblysy Jańaózen qalasynda saǵat 17:20-da qala ákimdiginiń aldynda turǵyndar jınaldy. Olar el basshylyǵyna vıdeoúndeý jasap, suıyltylǵan gaz baǵasyn túsirýdi surady.

Sol kúni saǵat 18:00-de adamdar tarady.

Sodan keıin 2 qańtarda narazylyq bildirýshiler sany birneshe júzdegen adamǵa artty, al aktsııaǵa qatysýshylar ishki joldy japty. Quqyq qorǵaý organdary kúsh qoldanǵan joq.

3 qańtardan bastap narazylyq bildirýshiler basqa qalalarda jáne óńirlerde shyǵa bastady. Sol kúni Mańǵystaý oblysynyń turǵyndaryn qoldaý maqsatynda basqa jeti óńirde - Atyraý, Aqtóbe oblystary, Nur-Sultan, Almaty qalalary, BQO, Almaty oblysy men ShQO-da «beıbit» mıtıngter bastaldy.

4 qańtarda mıtıngiler jalǵasty, al oǵan qoldaý bildirgen óńirler sany 11-ge jetti. Qatysýshylar sany 37 myń adamǵa deıin ósti. Almaty men Shymkentte qarýly shabýyldar jasaldy.

Qańtardaǵy oqıǵalardyń tolyq hronologııasymen myna siltemeden tanysýǵa bolady.