Qańtar oqıǵasy: Qyzylordada 72 qylmystyq is boıynsha tergeý amaly júrgizilýde

QYZYLORDA. QazAqparat - Qyzylorda oblysynda qańtar oqıǵasy kezindegi jaǵdaı boıynsha 72 qylmystyq is tirkelip, tergeý amaldary júrgizilýde, dep habarlaıdy QazAqparat tilshisi.

Oblys boıynsha 72 qylmystyq is tirkeldi. Onyń ishinde 5-i terrorızm, 2-i adam óltirý, 1-i jappaı tártipsizdik, 4-i qarýlardy jymqyrý, 4-i bılik ókiline qatysty kúsh qoldaný, 2-i laýazymdyq ókilettikterdi asyra paıdalaný jáne 54-i basqa derekter boıynsha qozǵalǵan.

«Búgingi kúni oqıǵa ornyn qarap-tekserý barysynda 100-den astam beınejazba, 83 dana qol-saýsaq izi, 73 dana gılza jáne basqa da zattaı dáleldemeler alyndy. Ustalǵandardan 6 atys qarýy men 63 patron tárkilendi. Tergep-tekserý barysynda 960 adam, onyń ishinde qylmystyq is sheńberinde 351 adam polıtsııa organdaryna jetkizildi. Qylmystyq quqyq buzýshylyqtarǵa qatysy bar ekendigi bultartpas aıǵaqpen bekitilgen 103 adam kúdikti retinde tanyldy», - dedi oblys prokýrorynyń birinshi orynbasary Maqsat Qazıev.

Aıta ketý kerek, 103 kúdiktiniń 63-i sottyń sanktsııasymen qamaýǵa alyndy. Qalǵanynyń densaýlyq jáne otbasy jaǵdaıyna baılanysty 40 adamǵa qatysty bultartpaý sharalary qoldanyldy. Prokýratýranyń bastamasymen 18 kúdiktige qatysty, onyń ishinde 1 aýyr naýqas, 2 kóp balaly ana bultartpaý sharasy negizinde úı qamaqqa aýystyryldy. Al 1 adam negizsiz ustalýyna baılanysty ýaqytsha ustaý ızolıatorynan bosatyldy.

Eske salsaq, Qyzylordada qańtar oqıǵasy kezinde máıithanadan 6 adamnyń denesi urlanǵan.