Qańtar oqıǵasy: Qylmyskerler Almaty ákimdiginde podpolkovnıkti óltirip, máıitin órtegen

NUR-SULTAN. QazAqparat – Qańtar oqıǵasy kezinde Almaty qalasy ákimdigin kúzetken podpolkovnıkti qylmyskerler óltirip, máıitin órtep jibergen. Bul týraly QR Bas prokýratýrasy 1-qyzmet bastyǵynyń orynbasary Eldos Qılymjanov aıtty, dep habarlaıdy QazAqparat tilshisi.

«Quqyq qorǵaý organdarynyń qyzmetkerleri óz boryshyn atqaryp, jappaı uryp-soǵý, kólik quraldarymen basyp ótý saldarynan jáne ózderi qarýsyz bola tura oq tııýden qaza boldy. Máselen, Almaty qalasy ákimdiginiń ǵımaratyn kúzetýge qatysqan, qarýsyz áskerı qyzmetshi, podpolkovnık Haırovtyń ólimi kezinde erekshe qatygezdik oryn tapty. Onyń máıiti ǵımarattyń shatyrynan tabyldy. Zorlyq-zombylyqpen óltirýden keıin, qylmyskerler aıǵaqtardy jasyrý úshin denesin órtep jibergen. 39 jastaǵy ofıtserdiń otbasy men kámeletke tolmaǵan eki balasy qaldy», - dedi ol Ortalyq kommýnıkatsııalar qyzmetindegi brıfıng barysynda.

Onyń dereginshe, Almaty, Qyzylorda, Taraz, Shymkent jáne Atyraý qalalarynda ákimdik, polıtsııa, Prezıdent rezıdentsııasy, telemunara ǵımarattaryna, dúkender men ózge de nysandarǵa qarýly shabýyl jasaý kezinde 92 adam qaza tapty.

«Qoǵamdyq qaýipsizdikti, quqyqtyq tártipti qamtamasyz etýdi buǵattaý maqsatynda jáne jaýyngerlik qarýdy urlaýǵa umtyla otyryp, olar polıtsııa organdary men Ulttyq qaýipsizdik komıtetiniń ǵımarattaryna uıymdasqan jáne jaqsy josparlanǵan shabýyldar jasady. Olar óz is-áreketterin toqtatpaı, memlekettik jáne jeke múlikterdi joıyp, quqyq qorǵaý qyzmetkerlerin de, qarapaıym azamattardy da óltirýmen qorqytty», - dedi Bas prokýratýra ókili.

Foto: ortcom.kz