Qańtar oqıǵasy: Kúsh qurylymdary qyzmetkerlerine qatysty 234 qylmystyq is tergelip jatyr

NUR-SULTAN. QazAqparat – Qańtar oqıǵasyna baılanysty kúsh qurylymdarynyń qyzmetkerlerine qatysty 234 qylmystyq is tergelip jatyr. Bul týraly Májilistiń jalpy otyrysynda qańtar oqıǵasyna qatysty máselelerdi qaraý kezinde Sybaılas jemqorlyqqa qarsy is-qımyl agenttiginiń tóraǵasy Oljas Bektenov málim etti, dep habarlaıdy QazAqparat tilshisi.

«Qańtar aıyndaǵy oqıǵalardan keıin, quqyq qorǵaý organdaryna kúshtik qurylymdardyń qyzmetkerleriniń áreketterine qatysty aryzdar kelip túse bastady. Atalǵan aryzdar boıynsha Sybaılas jemqorlyqqa qarsy qyzmetke prokýratýradan jáne Іshki ister mınıstrliginen 125 qylmystyq is kelip tústi. Sybaılas jemqorlyqqa qarsy qyzmet 109 aryz boıynsha sotqa deıingi tergep-tekserýdi bastady. Nátıjesinde, Sybaılas jemqorlyqqa qarsy qyzmet 234 qylmystyq is boıynsha tergeý júrgizip jatyr», dedi O. Bektenov.

Onyń aıtýynsha, 11 aryzdanýshynyń olardy joǵary temperatýrany qoldana otyryp, azaptaý faktisi boıynsha tirkelgen qylmystyq is aıasynda barlyq keshendi jedel-tergeý is-sharalary ýaqtyly ótkizildi.

«Nátıjesinde, aryzdanýshylar olarǵa qatysty tyıym salynǵan tergeý ádisterin qoldanǵan polıtsııa qyzmetkerin tanydy.

Barlyq dáleldemeler bekitilgennen keıin, atalǵan qylmystyq is arnaıy prokýrorlarǵa berildi», - dedi agenttik basshysy.