Qańtar oqıǵasy kezinde júzge jýyq adamnyń ómirin saqtap qaldyq - almatylyq medbıke
Marjan Qasenova Almaty medıtsınalyq kolledjin támamdaǵan.
«1998 jyly №7 qalalyq klınıkalyq aýrýhanaǵa jumysqa turdym, anestezıologııa, reanımatsııa jáne qarqyndy terapııa bólimshesiniń neırohırýrgııa palatasynda jumys istedim. Reanımatsııadaǵy jumys óte aýyr. Munda ómir men ólimniń arasyndaǵy naýqastar jatady, solarǵa kútim jasaımyz. Kún saıyn biz ártúrli jaraqattar men aýrýlarmen aýyratyn naýqastardy qabyldaımyz»,- deıdi ol.
Marjan Qasenova 2016 jyldan beri №7 qalalyq klınıkalyq aýrýhananyń anestezıologııa, reanımatsııa jáne qarqyndy terapııa bólimshesiniń aǵa meıirbıkesi mindetin atqarady. Onyń jalpy eńbek ótilimi 34 jyl.
«Bizdiń jumysymyz óte jaýapty. Tótenshe jaǵdaılar kóp bolady. Mundaı jaǵdaılarda meıirbıkelerdiń atqarǵan eńbegin sózben aıtyp, baǵalaý múmkin emes. Olardyń densaýlyq saqtaý salasyndaǵy róli joǵary. Jumystyń joǵary jaýapkershiligine, qıyndyǵyna qaramastan, olar kásibine adal, bundaı iste tek óz mamandyǵyn jaqsy kóretin jandar ǵana júredi - dedi Marjan Qasenova.
Búgingi kúni № 7 qalalyq klınıkalyq aýrýhanada 700-den astam meıirbıke jumys isteıdi. Emdeý mekemesiniń anestezıologııa, reanımatsııa jáne qarqyndy terapııa bólimshesinde 55 meıirbıke jáne 18 meıirger jumys isteıdi.
«Qańtar oqıǵasy kezinde bizdiń klınıkanyń medıtsınalyq qyzmetkerleri júzge jýyq adamnyń ómirin saqtap qaldy. Oǵan meıirbıkeler úlken úles qosty. Meniń oıymsha, bul bizdiń paryzymyz», - deıdi ol.
Medıtsına salasynda mol tájirbıe jınaqtaǵan keıipkerimiz qazir bilgenin jastarǵa úıretýde.
«Men uzaq jyldar boıy neırohırýrgııalyq palatada bas súıek-mı jaraqaty bar patsıenttermen jumys istedim. Bul úlken tájirbıe boldy. Endi bilgenimdi jas áriptesterime úıretip jatyrmyn. Bizde saýatty mamandar kóp. Biraq tájirbıe eshqashan artyq bolmaıdy. Sondyqtan árbir kelgen jas mamandy úıretemin. Olardyń barlyq bastamalaryn qoldaımyn», - deıdi keıipkerimiz.
Aıta keteıik, Marjan Qasenova 2008 jyly Almaty qalasy Áýezov aýdanynyń úzdik meıirbıkesi atandy. 2018 jyly «Meıirbıke isi» mamandyǵy boıynsha bilimin jetildirý úshin joǵary oqý ornyna túsip, ony 2020 jyly aıaqtady.
Sol jyly QR Densaýlyq saqtaý mınıstrliginiń «Densaýlyq saqtaý isine qosqan úlesi úshin» medalimen marapattaldy.
Sonymen qatar, úsh uldyń anasy, úlgili otbasynyń tiregi.
Aıtýynsha, otbasy oǵan barlyq jaǵynan qoldaý kórsetedi.
«Otbasym-meniń tiregim. Nemerem bar. Jumystan qolym bos ýaqytty otbasyma jáne nemereme arnaımyn. Men óz kásibimdi jaqsy kóremin jáne maqtan etemin. Bizdiń mindetimiz-adamdarǵa kómektesý. Men adam janyna arasha bolatyn densaýlyq salasynda eńbek etkenim jáne adamdardyń jazylýyna óz úlesimdi qosatyn múmkindigim úshin qýanyshtymyn», - deıdi keıipkerimiz.