Qańtar oqıǵasy kezinde urlanǵan qarýdyń úshten biri ǵana tabyldy - Bas prokýratýra

NUR-SULTAN. QazAqparat – Qańtar oqıǵasy kezinde urlanǵan qarýdyń úshten biri ǵana tabyldy, qalǵany qylmyskerlerdiń qolynda. Bul týraly QR Bas prokýratýrasy 1-qyzmet bastyǵynyń orynbasary Eldos Qılymjanov aıtty, dep habarlaıdy QazAqparat tilshisi.

«Quqyq qorǵaý organdary ǵımarattaryna shabýyldaý nátıjesinde 1 259 tabeldik qarý urlandy, onyń ishinde avtomattar, tapanshalar men granatomettar boldy. Atap aıtqanda, Almaty oblysynda polıtsııa departamenti ǵımaratynan 53 avtomat, 367 tapansha, 1 granatomet, sondaı-aq 23 myńnan astam patron urlandy. Jambyl oblysynda 200 avtomat, 148 tapansha, 11 granatomet, bir pýlemet jáne 40 myńǵa jýyq patron qoldy boldy», - dedi ol Ortalyq kommýnıkatsııalar qyzmetindegi brıfıng barysynda.

Bas prokýratýra ókiliniń atap ótýinshe, Rezıdentsııada qıratýlardan keıin 130 dana qarý men oq-dárilerdiń jetispeýshiligi anyqtaldy. Onyń ishinde 80 granata, 17 tapansha, 11 avtomat, 21 granatomet jáne snaıper myltyǵy bar.

«Barlyq bul faktiler boıynsha tergep-tekserýler júrgilip jatyr. Qarý-jaraq qoımalary tabylyp, olarǵa qatysy bar adamdar anyqtalýda. Qazirgi ýaqytta 481 birlik qarý tabyldy. Bul barlyq urlanǵan qarýdyń úshten biri. Qalǵany qylmyskerlerdiń qolynda», - dedi Eldos Qılymjanov.