Qańtar oqıǵasy kezinde urlanǵan eki myńnan astam qarý áli qylmyskerlerdiń qolynda
«Buryn habarlanǵandaı, jappaı tártipsizdikter barysynda qarý-jaraq dúkenderinen jáne quqyq tártibi organdarynyń ákimshilik ǵımarattarynan qarýdyń 2 900-dan astam birligi, sondaı-aq 63 180 oq-dári urlandy. Urlanǵan zattardyń ishinde 35 granata atqysh, 8 pýlemet, 268 avtomat, 17 vıntovka, 594 tapansha, 98 arnaıy myltyq pen 239 jaraqattaıtyn tapansha bar. Osyǵan baılanysty ishki ister organdary urlanǵan qarýdy tabý men qaıtaryp alý boıynsha belsendi is-sharalardy jalǵastyrýda», - dedi Sanjar Ádilov Ortalyq kommýnkatsııalar qyzmetindegi brıfıngide.
Onyń aıtýynsha, polıtsııa qyzmetkerleri qylmyskerler qarýdy jasyrǵan 215-ten astam oryndy tapty. Olardan qarýdyń 721 birligi, onyń ishinde 2 granata atqysh, 43 avtomat, ártúrli myltyqtyń 189 danasy men 11 myńnan astam oq-dári, sondaı-aq arnaıy quraldar men optıkalyq jabdyqtar alyndy.
«Máselen, Taraz qalalyq polıtsııa basqarmasynyń qyzmetkerleri salynyp bitpegen úıde qarý saqtalatyn jerdi anyqtady. Onda Jambyl oblystyq polıtsııa departamentiniń ǵımaratynan urlanǵan «Kalashnıkov» avtomaty men oǵan jabdyqtalǵan oqjataryn, kesilgen ańshy myltyǵyn, jaraqattaıtyn tapanshany jáne 200-den astam oq tabyldy. Jalpy búgin 1554 qarý men 39 myńnan astam oq-dári tabylyp, alyndy. Onyń ishinde 10 granata atqysh, 6 pýlemet, 158 avtomat, 348 tapansha, 113 arnaıy myltyq, 216 jaraqattaıtyn tapansha men taǵy basqalar bar», - dedi Sanjar Ádilov.
Departament bastyǵynyń dereginshe, Jambyl oblystyq polıtsııa departamentiniń qyzmetkerleri jedel-izdestirý is-sharalary barysynda 2 jergilikti turǵyndy anyqtady. Olar Almaty qalasynda Abylaı han kóshesindegi «Qorǵan» dúkeninen urlanǵan «Vepr» kesilgen qarýynyń 2 danasyn, «Kolt» tapanshasyn jáne ártúrli kalıbrli 61 oqty satpaqshy bolǵan kezde ustaldy. Kúdiktiler ýaqytsha ustaý ızolıatoryna qamaldy jáne sottyń sanktsııasynan kúzetpen ustaýǵa alyndy. Sonymen birge túsindirme jumysynyń nátıjesinde azamattar qarýdyń 147 birligin óz erkimen tapsyrdy.
«Búgingi tańda qylmyskerlerdiń qolynda aýqymdy arsenal - urlanǵan múliktiń 2 myńnan astam birligi qalyp otyr. Bul degenimiz – úlken qaýip. Óıtkeni qylmyskerler kez kelgen ýaqytta ony beıbit azamattarǵa qarsy paıdalana alady. Osy baǵyttaǵy jumys jalǵasýda jáne mınıstrliktiń erekshe baqylýynda», - dedi ol.
