Qańtar oqıǵasy kezinde urlanǵan 934 qarý tabyldy

ASTANA. QazAqparat – Qańtardaǵy jappaı tártipsizdikter kezinde urlanǵan qarýlardy izdep tabý jumysy júrip jatyr, dep habarlaıdy QazAqparat tilshisi.

«Jappaı tártipsizdikter kezinde qyzmettik jáne azamattyq qarýlar urlandy. Bul azamattardyń ómirine qaýip tóndiretini belgili. Osy oraıda polıtseıler urlanǵan qarýlardy izdep tabý jumysyn jalǵastyryp jatyr. Sonymen qatar zańsyz aınalymdaǵy qarýlardy tárkileý boıynsha belsendi jumys júrýde. Búgingi kúnge deıin shuǵyl profılaktıkalyq keshendi is-sharalar barysynda 3 364 dana qarý jáne 55 myńnan asa oq-dári alyndy», - dedi QR ІІM Tergeý departamentiniń bastyǵy Sanjar Ádilov Ortalyq kommýnıkatsııalar qyzmeti alańynda ótken baspasóz máslıhatynda.

Tergeý departamenti basshysynyń málimetinshe, alynǵan 934 qarý jappaı tártipsizdikter kezinde urlanǵan.

«Tek sońǵy aıda 645 dana qarý zańsyz aınalymnan alyndy. Onyń kóbisiniń nómiri óshirilgen. Krımınalıstıkalyq zertteý qorytyndysy boıynsha 20 dana qarý «qańtar oqıǵasy» kezinde urlanǵan bolyp shyqty», - deıdi ol.

Sondaı-aq spıker urlanǵan qarýlardy izdeý sharasy jalǵasyp jatqanyn aıtty.

Buǵan deıin habarlaǵanymyzdaı, qańtardaǵy jappaı tártipsizdikterge qatysty 117 adam bas bostandyǵynan aıyryldy.

Foto: polisia.kz