Qańtar oqıǵasy kezinde urlanǵan 343 mln teńgeden astam somanyń múlki tabyldy

NUR-SULTAN. QazAqparat – Іshki ister organdary qańtar oqıǵasy kezinde urlanǵan 343 mln teńgeden astam somanyń jeke menshik múlkin taýyp, tárkilegen. Bul jaıynda Іshki ister mınıstrligi Tergeý departamenti bastyǵynyń orynbasary Muhtar Qojaev Ortalyq kommýnkatsııalar qyzmetinde ótken brıfıngide aıtty, dep habarlaıdy QazAqparat tilshisi.

«Jappaı tártipsizdikterden jábirlenýshi bolyp tanylǵan azamattarǵa kelgen shyǵyndy óndirý aıasynda azamattar men bıznes sýbektilerinen urlanǵan 343 mln teńgeden astam somanyń múlki tabylyp, alyndy. Onyń ishinde 12 avtokólik, 317 turmystyq tehnıka, 189 zergerlik buıym, 386 uıaly telefon, 550-deı ártúrli kıim-keshek, 16 mln teńgeden astam aqshalaı qarajat jáne taǵy basqalary bar.

Іshki ister organdary jappaı tártipsizdikter barysynda urlanǵan qarýdy izdep taýyp tárkileý boıynsha belsendi jumysty jalǵastyrýda», - dedi mınıstrlik ókili.

Bas prokýratýranyń deregine súıensek, arnaıy prokýrorlar qańtardaǵy jappaı tártipsizdikter boıynsha 53 isti qarap jatyr .