Qańtar oqıǵasy kezinde urlanǵan 2 089 qarý tabylmaı jatyr

NUR-SULTAN. QazAqparat – Qańtar oqıǵasy kezinde urlanǵan 2 089 qarý tabylmaı jatyr. Bul týraly QR ІІM Tergeý departamenti bastyǵynyń orynbasary Muhtar Qojaev aıtty, dep habarlaıdy QazAqparat tilshisi.

«Qazir urlanǵan qarýdyń áli 2 089 birligi anyqtalmaǵan. Onyń ishinde qarý-jaraq dúkenderinen urlanǵan 1 282 azamattyq qarý, 648 tabeldik atys qarýy, 159 jaraqat salatyn, gaz jáne sıgnaldy tapansha bar», - dedi ol Ortalyq kommýnıkatsııalar qyzmetindegi brıfıng barysynda.

Muhtar Qojaevtyń atap ótýinshe, urlanǵan qarýdy anyqtaý baǵytynda jumys jalǵasyp jatyr.

«Sonymen qatar, maqsatty túrde júrgizilgen jedel-aldyn alý is-sharalarynyń nátıjesinde polıtsııa qosymsha 1 936 qarýdy tárkiledi. Olardyń kóbisiniń tirkeý nómirleri óshirilgen. Sondyqtan qazir olardyń «qańtar oqıǵasy» kezinde qoldanýǵa qatystylyǵy anyqtalýda», - dedi departament bastyǵynyń orynbasary.