Qańtar oqıǵasy kezinde apaly-sińlili qyzdar Almaty áýejaıyn tonaǵan
ALMATY. QazAqparat- Kóliktegi polıtsııa qańtardaǵy tártipsizdik kezinde Almaty áýejaıynda dúken tonaǵan úsh adamdy ustady. Olardan taýardyń 200-den astam túri tárkilendi, dep habarlaıdy QazAqparat tilshisi.
Kóliktegi polıtsııa departamentiniń bastyǵy Ońal Bákıevtiń aıtýynsha, ІІM kóliktegi polıtsııa departamentiniń jedel-tergeý toby Almaty áýejaıyndaǵy dúkenderden taýar urlaý faktisi boıynsha sotqa deıingi tergeý júrgizip jatyr.
Beınebaqylaý jazbalaryn qaraý kezinde úsh kúdikti anyqtaldy: apaly-sińlili qyzdar jáne bireýiniń kúıeýi. Úsheýi de - Almaty oblysynyń turǵyny.
«Olar 6 qańtarǵa qaraǵan túni jappaı tártipsizdik kezinde áýejaıda bireýdiń múlkin urlaǵan. Kúdiktilerdiń turǵylyqty jeri boıynsha tekserý kezinde zattaı aıǵaq – elıtalyq alkogol, sondaı-aq 130 túrli parfıýmerlik jáne kosmetıkalyq ónim alyndy. Sonymen qatar kofehanadan, kádesyı dúkeninen jáne dárihanadan urlanǵan 94 túrli taýar tárkilendi», - dedi kóliktegi polıtsııa departamentiniń bastyǵy Onal Bákıev.
Atalǵan fakti boıynsha Qylmystyq kodekstiń 188-babyny sáıkes («Urlyq») sotqa deıingi tergeý bastaldy.
«40 jastaǵy er adamǵa qatysty qamaýǵa alý túrindegi bultartpaý sharasy sanktsııalandy, 34 jastaǵy jáne 26 jastaǵy áıelder jas balalary bolýyna baılanysty eshqaıda ketpeý týraly qolhat berdi»,- dedi ol.
