Qańtar oqıǵasy kásipodaqtardyń pármensizdigin kórsetti – sarapshy
«Búginde biz demokratııalyq qoǵamda ómir súrýge tyrysyp jatyrmyz. Bárin de demokratııalyq prıntsıptermen qurǵymyz keledi. Biraq qoǵam tarapynan jasalyp jatqan biraz áreketter demokratııaǵa emes, ohlokratııaǵa jaqyndaý bolyp tur. Sebebi, demokratııa degenimiz – ókildik prıntsıptiń saqtalýy. Al ohlokratııa – adamdardyń tikeleı shyǵyp, tobyr retinde bılik ornatýy. Ekeýi uqsas negizi. Basty aıyrmashylyǵy – demokratııada ókildik prıntsıptiń bolýy. Qazir azamattar qalaýyn memleketke tikeleı aıtyp jatyr. Sebebi eki ortadaǵy ókildi organdardyń jumysy durys rettelmegen. Ókildi organ retinde ne máslıhat depýtattary, ne kásipodaqtar shyǵýy kerek. Osy eki ınstıtýt mindetin durys atqarsa, eńbek ujymdaryna búgingideı toptasyp alyp, memleketke tikeleı talap joldaýdyń qajeti de bolmaıtyn edi. Ár uıymnyń kásipodaǵy bolýy kerek. Kásipodaq sol uıymnyń basshylyǵymen kelissóz júrgizip, jumysshylardyń quqyǵyn qorǵaýy kerek», - dedi sarapshy.
Zertteýshi elimizde kásipodaqtardyń úlken saıası ınstıtýtqa aınalýy úderisi áli aıaqtalyp bolǵan joq dep esepteıdi.
«Kásipodaqtar bar, biraq óziniń bastapqy fýnktsııasyn tolyqqandy atqarmaı otyr. Kásipodaq degen tek týǵan kúnder men merekelik quttyqtaý ótkizetin uıym bolyp qalmaýy kerek. Mysaly, qańtardaǵy oqıǵa kezinde Jezqazǵandaǵy jumysshylardyń qoıǵan talaby 15 tarmaqtan turdy. Eńbekaqy mólsheri, qosymsha tólenetin ústemeaqy kólemi, densaýlyq saqtaý sharalary men eńbek jaǵdaıy degen sııaqty kásipodaqpen birlesip retteıtin máselelerdi qamtydy. Onyń bárine memleket tikeleı aralaspaýy kerek. Demokratııalyq qoǵamdy tolyqqandy qurǵymyz kelse, soǵan saı saıası ınstıtýttardyń tolyqqandy fýnktsıonaldy jumys isteýine múmkindik berýimiz kerek», - dedi Indıra Rystına.
