Qańtar oqıǵasy: Qamaýdaǵy 199 kúdiktige bultartpaý sharasy ózgertildi

NUR-SULTAN. QazAqparat – Qańtar oqıǵasyna qatysty kúdiktilerge taǵaıyndalǵan bultartpaý sharalary qaıta qaralyp jatyr. Bul týraly QR Bas prokýratýranyń Qylmystyq qýdalaý qyzmeti bastyǵynyń orynbasary Eldos Qılymjanov aıtty, dep habarlaıdy QazAqparat.

«Prokýratýra organdary buryn tańdalǵan bultartpaý sharalaryn qaıta qaraý boıynsha jumys júrgizýde. Jeke basyn, densaýlyq jaǵdaıyn jáne tergeýge kórsetilgen kómekti eskere otyryp, 199 kúdiktige «qamaýda ustaý» sharasy «eshqaıda ketpeý týraly» qolhatqa, «kepilge», «úıqamaqqa alýǵa» jáne «jeke kepilgerlikke» aýystyryldy.

Qańtar oqıǵalarynyń sebepteri men jańa mán-jaılarynyń anyqtalýyna qaraı, olar da jurtshylyqqa jetkiziletin bolady. Sonymen birge, tek resmı derekterge senýge jáne jalǵan málimetterdi taratpaýǵa shaqyramyz», - dedi Bas prokýratýra ókili Ortalyq kommýnıkatsııalar qyzmetinde ótken brıfıngte.

Aıta keteıik, qazir Qańtar oqıǵalaryna qatysty sotqa deıingi 3 666 tergep-tekserý isi bar. 162 aıyptalýshyǵa qatysty 101 qylmystyq is sotqa joldandy jáne 62 adam sottaldy.

Atys qarýyn, oq-dáriler men jarylǵysh zattardy saqtaǵandar olardy erikti túrde tapsyrsa jáne áreketterinde basqa qylmys quramy bolmasa, qylmystyq jaýapkerishilikten bosatylady.

Qańtar oqıǵasyna qatysty tergeý ızolıatorlarynda otyrǵan 751 adamnyń jaǵdaıyn kún saıyn prokýrorlar men quqyq qorǵaý uıymdary tekseredi.