Qańtar oqıǵasy: erteń Senatta raqymshylyq týraly zań jobasy qaralady
Senat Tóraǵasy Máýlen Áshimbaev Prezıdenttiń qańtar oqıǵasyna qatysýshylarǵa raqymshylyq jasaý týraly bastamasy gýmanızmniń jáne izgiliktiń jarqyn kórinisi ekenin atap ótti.
«Memleket basshysy óz Joldaýynda qańtar oqıǵasyna qatysýshylarǵa bir rettik raqymshylyq jarııalaýdy tapsyrdy. Soǵan baılanysty bir top Parlament depýtaty tıisti zań jobasyna bastamashylyq jasady. Aldaǵy ýaqytta qajetti jumystardy atqaryp, qorytyndylaryn alyp, atalǵan zańdy barynsha tezirek qabyldaýymyz kerek», - dedi Máýlen Áshimbaev.
«Raqymshylyq jasaý týraly» zań jobasynyń normalary qylmystyq teris qylyqtar, onsha aýyr emes jáne aýyrlyǵy ortasha qylmystar jasaǵandardy jazadan bosatýdy kózdeıdi. Mundaı qylmystar úshin jazasyn ótegenderden sottylyǵy alynady. Zań jobasy arqyly aýyr qylmys jasaǵandar úshin sot taǵaıyndaǵan jaza tórtten úshke, al asa aýyr qylmystar úshin jartysyna qysqartylady.
Sondaı-aq, zań jobasynda bosatylatyn adamdardy jumysqa ornalastyrýdy, olarǵa medıtsınalyq kómek kórsetýdi jáne qujattaryn resimdeýdi kózdeıtin, ıaǵnı qaıta áleýmettendirýdi qamtamasyz etetin normalar bar. Aıta ketý kerek, azaptaýlar jasaǵandar, terrorıster, ekstremıster, retsıdıvıster jáne tártipsizdikterdi uıymdastyrýshylar raqymshylyqqa jatpaıdy.
Aıta ketsek, atalǵan zań jobasy Májilistiń jalpy otyrysynda maquldanǵan bolatyn.
Sonymen qatar, erteńgi otyrysta «Eýrazııalyq ekonomıkalyq odaqtyń tehnıkalyq reglamentteri talaptarynyń saqtalýyna memlekettik baqylaýdy (qadaǵalaýdy) Eýrazııalyq ekonomıkalyq odaqqa múshe memleketterdiń kórsetilgen saladaǵy zańnamasyn úılestirý maqsatynda júzege asyrý qaǵıdattary men tásilderi týraly kelisimdi ratıfıkatsııalaý týraly» zań jobasy da qaralady. Bul qujat atalǵan salada múshe memleketterdiń zańnamasyn úılestiredi. Kelisimde qaýipti ónim týraly aqparattandyrý júıesiniń jumysyn qamtamasyz etý qarastyrylǵan. Sol arqyly EAEO-nyń tehnıkalyq reglamentteriniń talaptaryna sáıkes kelmeıtin ónim týraly málimetter almasý júrgiziledi.
