Qańtar oqıǵasy boıynsha terrorızm aktilerine qatysty 45 is qaralyp jatyr

NUR-SULTAN. QazAqparat – Qańtar oqıǵasy boıynsha tergeý organdarynyń is júrgizýinde 5 041 qylmystyq is bar. Bul týraly Ortalyq kommýnıkatsııalar qyzmetinde QR Bas prokýratýrasy 1-qyzmet basshysynyń orynbasary Eldos Qılymjanov aıtty, dep habarlaıdy QazAqparat tilshisi.

«Bas prokýratýra qańtar oqıǵalaryna baılanysty qylmystyq isterdiń tergelý barysy týraly habarlaıdy. Jappaı tártipsizdikter men terrorızm aktileri Almaty, Shymkent qalalary, Aqtóbe, Atyraý, Almaty, Jambyl, Qyzylorda jáne Shyǵys Qazaqstan oblystarynda bolǵan. Árbir óńirde tergeý toptary tergeý áreketterin júrgizip, olardyń aıaqtalýyna qaraı qylmystyq ister sotqa joldanýda. Qazirgi kezde tergeý organdarynyń is júrgizýinde atalǵan sanatta 5 041 qylmystyq is bar. Olardyń ishinde jappaı tártipsizdikter boıynsha 49 is, terrorızm aktilerine qatysty – 45», - dedi E. Qılymjanov.

Onyń aıtýynsha, Shymkent qalasynyń prokýratýrasy qıratýlar, múlikterdi joıý jáne avtokólikterdi órtegeni úshin, ıaǵnı jappaı tártipsizdikterge qatysqany boıynsha 8 kúdiktiniń isin sotqa berdi.

«Atalǵan beınejazbada jappaı tártipsizdikter beınelengen. Qyzylorda oblysynda osy tektes aıyppen 7 adamǵa qatysty ister kináni moıyndaý týraly protsestik kelisim jasaý arqyly sotqa jiberildi. Mundaı isterdiń sotta qaralý erekshelikteri jóninde habarlap ketsem. Kúdikti aıyptaýǵa, dáleldemelerge, keltirilgen zalalmen daýlaspaǵan kezde jáne jazanyń túri men mólsherimen kelisken jaǵdaıda onymen kináni moıyndaý týraly kelisim jasalady. Sotta 10 táýlikten aspaıtyn merzimde qaralady jáne jazanyń mólsheri osy baptyń sanktsııasyndaǵy eń joǵary merzimniń jartysynan aspaıdy. Bul rásim boıynsha 3 adamǵa qatysty úkim qabyldanyp, olar boıynsha bas bostandyǵynan aıyrýǵa baılanysty emes jazalar taǵaıyndaldy», - dedi Bas prokýratýra ókili.