Qańtar oqıǵasy belsendi reformalar júrgizý qajettigin kórsetti- Máýlen Áshimbaev

ALMATY. QazAqparat - Qańtar oqıǵasy kóptegen baǵyt boıynsha belsendi reformalar júrgizý qajettigin kórsetip berdi. Bul týraly Almatyda ótip jatqan TMD Parlamentaralyq Assambleıasy Keńesiniń mereıtoılyq otyrysynda Senattyń Tóraǵasy Máýlen Áshimbaev aıtty, dep habarlaıdy QazAqparat tilshisi.

Jıyn barysynda sóz sóılegen Máýlen Áshimbaev qasiretti qańtar oqıǵasy kezinde Qazaqstan halqyna qoldaý tanytyp, alańdaýshylyq bildirgeni úshin TMD elderinen kelgen áriptesterine alǵysyn jetkizdi.
Sonymen qatar, TMD parlamentshilerine elimizde Memleket basshysynyń bastamasymen qolǵa alynǵan aýqymdy reformalar jóninde keńinen aıtyp berdi.

«Qańtar oqıǵasy kóptegen baǵyt boıynsha belsendi reformalar júrgizý qajettigin kórsetip berdi. Osyǵan baılanysty bizdiń elimiz áleýmettik, ádiletti jáne demokratııalyq memleket qalyptastyrý maqsatymen Jańa Qazaqstan qurýdy qolǵa aldy. Osy baǵyttaǵy konstıtýtsııalyq reformalardyń negizgi nátıjeleriniń biri retinde Qazaqstanda parlamentarızmdi odan ári damytý jáne Parlamenttiń eldiń saıası júıesindegi rólin arttyrý kózdelip otyr», – dedi Máýlen Áshimbaev.

Aıta keteıik, Almatyda TMD Parlamentaralyq Assambleıasynyń mereıtoılyq otyrysy ótip jatyr.