Qańtar oqıǵasy: Bas prokýror terakt jasaý aıyby taǵylǵan eki oqıǵa týraly aıtyp berdi
«Búginde bizdiń ister boıynsha 573 adam sottaldy. Onyń ishinde terakt jasaý faktisi boıynsha 2 is bar. Qyzylordada Qudaıbergenov áskerı qyzmetkerdiń avtokóligin tartyp alyp, áskerıler tobyna shabýyl jasaǵan. Sonyń saldarynan Qaısarov qaza boldy. Al Tarazda Bekbolov esimdi turǵyn ákimdiktiń ǵımaratyna shabýyl jasaýǵa qatysyp, polıtsııa qyzmetkerleri men áskerılerdiń bastarynan oq atýǵa shaqyrǵan», - dedi Berik Asylov Májilistiń búgingi otyrysynda.
Qazirgi tańda jappaı tártipsizdikti uıymdastyrýshylar retinde 18 adam anyqtaldy.Olardyń 13-ine qatysty is sotta qaralýda.
«Tártipsizdikke qatysqan kóp adamdy toqtatýǵa quqyq qorǵaý kúshteriniń múmkindigi bolmady. Onyń ústine, qyzmetkerlerdiń basym bóliginde qarý bolǵan joq. Olar sońyna deıin tek arnaıy quraldardy – sý atqyshtar, rezınalyq taıaqshalardy qoldandy. Biraq sol ýaqytta júzdegen tártip saqshylary jaralanǵan edi, onyń ishinde oqtan jaraqat alǵandar da boldy. Al bir ofıtser qalalyq ákimdikte bolǵan órtte tirideı janyp ketti», - dedi Bas prokýror.
Jappaı tártipsizdik barysynda qaza tapqandarǵa erekshe nazar aýdarý kerek. Mysaly, obektilerdi qorǵaý jáne lańkestikke qarsy operatsııa barysynda 238 azamat qaza tapty, olardyń 41 buryn sottalǵan. Bas prokýratýra tergeý barysynda barlyq aqparatty qaıta tekserip, 67 azamattyń jappaı tártipsizdikterge qatysqanyn, 142 adam terrorızmge qarsy operatsııa kezinde erekshe rejımdi buzǵanyn, 4 adam basqa quqyq buzýshylyqtar barysynda qaza tapqanyn anyqtady.
Tártipsizdikter men odan keıingi tóńkeris jasaý áreketi muqııat josparlanǵan. «Qańtar oqıǵalaryna» daıyndyq búkil 2021 jyl boıy jasyryn túrde júrgizilgen.
Buǵan deıin B. Asylov qańtardaǵy tártipsizdikke 35 jasqa deıingi adamdar kóp qatysqanyn aıtqan edi.
