Qańtar oqıǵasy aıasynda 11 aımaqta agressıv toptar zorlyq-zombylyq satysyna ótti - Bas prokýratýra

NUR-SULTAN. QazAqparat – Qańtardaǵy oqıǵa barysynda 11 aımaqta agressıv toptar zorlyq-zombylyq satysyna ótti. Bul týraly Parlament Májilisiniń jalpy otyrysynda QR Bas prokýrory Berik Asylov málim etti, dep habarlaıdy QazAqparat tilshisi.

«3-shi, 4-shi jáne 5-shi qańtarda Memleket basshysy demonstranttarǵa úndeý joldap, zańdy saqtaýǵa jáne destrýktıvti kúshterdiń arandatýyna boı bermeýge shaqyrdy. Alaıda, birneshe márte sabyr saqtaýǵa shaqyrýǵa qaramastan, qylmystyq jáne radıkaldy elementter belsendi de qatań áreketterge kóshti. 4-shi jáne 5-shi qańtarda azamattar jıyny agressıv topqa aınalyp, bul 11 aımaqta zorlyq-zombylyq satysyna ótti», - dedi B. Asylov «qańtar oqıǵasy» týralıa baıandamasynda.

Onyń aıtýynsha, uıymdastyrýshylar aıqyn josparmen áreket etken. «Vatsap» jáne «Telegramm» arqyly toptyń jınalýy men qozǵalysyn úılestirgen.

«Olar kóp adamdy jınap alyp, armatýra, taıaq, tas, «Molotov kokteılimen» qarýlandy. Keıinnen toptyń bir bóligi dúkenderdi qıratyp, tonaýǵa kiristi. Tonaýdan keıin, qylmystyń izin jasyrý úshin, tipti kóppáterli úılerdiń birinshi qabatyndaǵy úı-jaılardy órtegen.

Basqa qarýly toptar maqsatty túrde, ákimdikterdiń, Prezıdent rezıdentsııasynyń, polıtsııanyń, Ulttyq qaýipsizdik komıtetiniń ǵımarattaryna shabýyl jasap, basyp aldy. Almatydaǵy áýejaı men basqa da nysandardy qıratty. Olar qorshaýdy qalaı buzý kerektigin bilip, polıtsııaǵa shabýyl jasady, atys qarýyn alý úshin, ańshy dúkenderin tonady. Teleefırge shyǵýǵa tyrysty, ol iske aspaı qalǵan kezde, telekompanııa keńselerin tonap, órtep jiberdi», - dedi Bas prokýror.