Qańtar oqıǵasy: Áskerıdi kólikpen basyp ketken Qyzylorda turǵyny 17 jylǵa sottaldy
Qyzylorda oblysynyń qylmystyq ister jónindegi mamandandyrylǵan aýdanaralyq sotynda jappaı tártipsizdikke qatysty ( 272 b. 2 b.), sondaı-aq áskerı qyzmetshiniń ómirine qol suǵýshylyq jasady (380-1 b. 2-b. 1), 6) t.) jáne terrorızm aktisin jasady (255b. 4b.) dep aıyptalǵan Q-ǵa qatysty qylmystyq is qaraldy.
2022 jyldyń 5 qańtarynda sottalýshy Q. «A» saýda úıiniń aldynda jappaı tártipsizdikke qatysyp, áskerı qyzmetshi T-ǵa kúsh qoldanǵan.
Onyń basqarýyndaǵy «Kamaz» áskerı kóligin basyp alyp, onyń rýline otyryp, gaz pedalin edenge deıin basyp, kirpishpen tirep, sheginip jatqan áskerı qyzmetshiler sapyna qaraı buryp, ózi kólikten sekirip túsken.
Saldarynan júk kóligi áskerı qyzmetshi M-ny basyp, ol alǵan jaraqatynan oqıǵa ornynda kóz jumǵan.
Sottalýshynyń kinási kýálardyń aıǵaqtarymen, qylmystyq is materıaldaryna tirkelgen beınejazbalarmen, sondaı-aq sot-medıtsınalyq saraptama qorytyndysymen dáleldendi.
Memlekettik aıyptaýshy sottalýshyny 20 jylǵa bas bostandyǵynan aıyrýdy surady.
Jábirlenýshiniń ókili - ómir boıyna sottaýdy, al sottalýshynyń advokattary - ony aqtaýdy surady.
Qylmys aýyr jáne asa aýyr qylmystar sanatyna jatady, ony jasaǵany úshin eń joǵary jaza - ómir boıyna bas bostandyǵynan aıyrý.
Qoǵamdyq qaýiptiń sıpaty men dárejesin, jaýaptylyq pen jazany jeńildetetin jáne aýyrlatatyn mán-jaıdy eskere otyryp, sot Q-ny 17 jylǵa bas bostandyǵynan aıyrdy.
Ol jazasyn qylmystyq-atqarý júıesiniń qaýipsizdigi barynsha joǵary mekemesinde óteıdi.
Terrorızm aktisi epızody boıynsha sottalýshy aqtaldy.
Sot úkimi zańdy kúshine engen joq.
