Qańtar oqıǵasy: Almatylyq kásipkerler shyǵyndy óteý erejesin jeńildetýdi surady

ALMATY. QazAqparat- Qańtar oqıǵasy kezinde zardap shekken bir top kásipker keltirilgen shyǵyndy dáleldeı almaı júr. Osyǵan baılanysty búgin olar «Aqıqat» qoǵamdyq komıssııasyna júgindi, dep habarlaıdy QazAqparat tilshisi.

«Aqıqat» qoǵamdyq komıssııasynyń keńsesine 20-ǵa jýyq kásipker keldi. Olar jappaı tártipsizdik kezinde kásipterine keltirilgen shyǵyndy dáleldeı almaı júr. Qoldarynda bar qujattary jaramsyz dep tanylǵan.

Solardyń biri — jeke kásipker Qarlyǵash Kertaıqyzy. Ol qaladaǵy saýda úıleriniń birinde erlerge arnalǵan kıim satqan. Qańtar oqıǵasy kezinde taýarlary órtenip, tonalǵan.

«Maǵan keltirgen shyǵyn 35 mln teńge. Meniń qolymda taýar paraǵy (tovarnaıa nakladnaıa) bar. Alaıda, bul qujatpen eshteńeni dáleldeı almaı júrmin. Sot-medıtsınalyq saraptama bizge taǵaıyndalmaıdy, óıtkeni, bizde mór de, shot-faktýrada joq. Býhgalterlik esep te júrgizilgen emes. Basty máselemiz osynda bolyp tur. Biz JK (jeke kásipker) bolǵandyqtan zań boıynsha bizden mundaı qujat talap etilmeıtin. Bizdiń bir ǵana usynysymyz bar: kásipkerlerdiń shyǵynyn óteýdiń erejesi jeńildetilse eken»,- deıdi jeke kásipker Qarlyǵash Kertaıqyzy.

Kásipkerlerdiń sózinshe, polıtsııada aryzdary qabyldanyp, qylmystyq is qozǵalǵan.

«Tonalǵan býtıkterimizge qatysty qylmystyq is qozǵaldy. Alaıda, bul máseleni túbegeıli sheshpeıdi. Mysaly, maǵan keltirilgen shyǵyn kólemi 50 mln teńge. Taýardy men ózim Túrkııadan tasymaldaımyn. Sondyqtan úkimet shyǵynymyzdy tolyq ótep berse degen ótinish bar. Sondaı- aq, shyǵyndy óteý erejesine tıisti ózgerister men tolyqtyrýlar engizilip, biraz jeńildetilse»,- deıdi kásipker Ǵalııa Kýrgýlına.

«Aqıqat» qoǵamdyq komıssııasynyń jetekshisi Aıman Omarova kásipkerlerge kómektesetinin atap ótti.

«Qoǵamdyq komıssııaǵa júgingen kásipkerler, qazir aryzdaryn jazyp, qoldarynda bar qujattaryn usynyp jatyr. Biz olarǵa barynsha kómektesýge tyrysamyz. Memleketten kómek suraımyz. Bári zań aıasynda sheshiledi dep úmittenemin»,- deıdi Aıman Omarova.