Qańtar oqıǵasy: Almatyda zardap shekken kásipkerlerdiń barlyq ótinishi qaraldy

ALMATY. QazAqparat - Almatyda zardap shekken bıznes sýbektilerinen 1355 ótinish tústi. Bul týraly Óńirlik kommýnıkatsııalar qyzmetiniń alańynda ótken brıfıngide qalalyq Kásipkerlik jáne ınvestıtsııalar basqarmasynyń basshysy Erkebulan Orazalın málim etti, dep habarlaıdy QazAqparat tilshisi.

Spıkerdiń sózinshe, óńirlik komıssııa Almatyda zardap shekken bıznes sýbektilerinen kelip túsken barlyq ótinishti qarap shyqty.

«Qazirgi ýaqytta, barlyq berilgen ótinishter 100% qamtyldy jáne olardy komıssııa qarady. InfoKazakhstan elektrondyq platformasyna 1188 kásipkerden barlyǵy 1355 ótinish kelip tústi. Óńirlik komıssııa májilisiniń qorytyndysy boıynsha 5 286,5 mln teńge somasyndaǵy 1139 ótinish, onyń ishinde, 4 194,6 mln teńge somasyndaǵy 595 ótinish bıýdjet qarajattarynan, 1 091,9 mln teńge somasyndaǵy 544 ótinish «Jańa Alataý» qorynyń qarajattarynan maquldandy», - dedi basqarma basshysy.

Sonymen qatar ol qalǵan 216 ótinish pysyqtalý ústinde ekenin jetkizdi, onyń ishinde 120 ótinish boıynsha qujattardyń tolyq toptamasy usynylmaǵan, 96 ótinish jeńildetilgen mehanızm sheńberinde ótem somasymen kelispeýine baılanysty sot saraptamasyna joldanǵan.

«Zardap shekken bıznesti tolyq qamtý jáne qala ekonomıkasyn jedel qalpyna keltirý maqsatynda, komıssııa «Qoldaý» kásipkerlik ortalyǵynyń janynan keńes berý shtabyn qurdy. Ótemi áli tólenbegen zardap shekken kásipkerler jumys kúnderi saǵat 09:00-den 18:00-ge deıin Almaty qalasy, Baızaqov kóshesi, 303 (101-kabınet) mekenjaıy boıynsha keńes alý úshin júgine alady», - dedi spıker.

Erkebulan Orazalın óńirlik komıssııanyń kelesi májilisi aldaǵy 12, 15 jáne 18 naýryzǵa josparlanǵanyn atap ótti.