Qańtar oqıǵasy: Aqtóbede qylmystyq ister boıynsha jaryssóz bastaldy
Qańtar oqıǵasynan soń qozǵalǵan qylmystyq is «Jappaı tártipsizdik», «Quqyq qorǵaý organy, arnaýly memlekettik organ qyzmetkeriniń, áskerı qyzmetshiniń ómirine qolsuǵýshylyq», «Qarýdy, oq-dárilerdi, jarylǵysh zattar men jarylys qurylǵylaryn jymqyrý ne qorqytyp alý» baptary boıynsha qaralyp jatyr.
Búgin jaryssóz kezinde memlekettik aıyptaýshy sottalýshy Ajnııazovqa qatysty Qylmystyq kodekstiń 272-baby 1-bóligin 272-babynyń 2-bóligine ózgertýdi usyndy. Bul bap boıynsha 4 jyldan 8 jylǵa deıingi merzimge bas bostandyǵynan aıyrý jazasy kózdelgen.
Sonymen birge kóligimen polıtsııa qyzmetkerlerin qaǵyp ketti dep aıyptalyp jatqan sottalýshy Isaevqa qatysty tergep-tekserý júrgen kezde kóliktiń tejegishi jumys istep turǵany anyqtalǵan. Polıtsııa kólikti beınekameralar arqyly taýyp, júrgizýshisin de ustady. Al alańǵa qıyrshyq tas tasymaldaýǵa tapsyrys bergen Ábıev sotta óz kinásin moıyndady. Sol júk kóligin júrgizgen Quttybaev pen Baımuratov ta sotta jaýap berip jatyr.
Sot otyrysy kezinde memlekettik aıyptaýshy sottalýshylardyń árqaısysyna jeke-jeke toqtalyp, taǵylǵan aıypty, olardyń is-áreketin tizbektep berdi. Memlekettik aıyptaýshynyń aıtýynsha, sot otyrysy kezinde birneshe sottalýshy taǵylǵan aıyppen kelispeı, kinásin moıyndamady. Sonymen birge memlekettik aıyptaýshy, keıbir sottalýshylardyń jazasyn jeńildetýdi surady.
«Ajnııazovti 4 jylǵa bas bostandyǵynan aıyrýdy suraımyz. «Raqymshylyq týraly» Zańǵa sáıkes jazasyn jeńildetip, túpkilikti 1 jylǵa bas bostandyǵynan aıyrýdy suraımyz.
Sottalýshy Isaevty Qylmystyq kodekstiń «Quqyq qorǵaý organy, arnaýly memlekettik organ qyzmetkeriniń, áskerı qyzmetshiniń ómirine qolsuǵýshylyq» jáne «Jappaı tártipsizdik» baptary boıynsha aıypty dep tanyp, túpkilikti 15 jylǵa bas bostandyǵynan aıyrýdy, múlki tárkileýdi suraımyz. Kóligi memleket kirisi úshin tárkilensin.
Sottalýshy Muhıtti 1 jyl 9 aıǵa, Ábıevti 10 aı 15 kúnge, Quttybaevty 9 aıǵa, Baımýratovty 9 aıǵa bas bostandyǵynan aıyrýdy suraımyz. Júk kóligin júrgizip, alańǵa qıyrshyq tas jetkizgen Quttybaev pen Baımuratovtyń kóligin memleket kirisine tárkileýdi suraımyz.
Sottalýshy Iskakovty túpkilikti 9 aıǵa, Quspanovty 9 aıǵa, Ómirálini 9 aıǵa, Omarovty 1 jyl 15 kúnge, Sádýaqasovty 10 aı 15 kún, Daýkendi 10 aı 15 kúnge, Amanǵosovty 10 aı 15 kúnge, Bekeevti 10 aı 15 kúnge, Ahmetovti 10 aı 15 kúnge, Qamıdi 4 jylǵa, Esmýrzaevany 10 aı 15 kúnge bas bostandyǵynan aıyrýdy suraımyz.
Sottalýshy Shamýratovty aıypty dep tanyp, Qylmystyq kodekstiń «Jappaı tártipsizdik» baby boıynsha aıypty dep tanyǵanymen, «Raqymshylyq týraly» Zańǵa sáıkes jazadan bosatýdy suraımyz», - dedi jaryssóz kezinde memlekettik aıyptaýshy.
Sot otyrysy kúni boıy ótti. Jaryssóz kezinde aıyptalýshylar men olardyń qorǵaýshylary da sóıledi. Kelesi sot otyrysy 17 qańtarda jalǵasady.
