Qańtar oqıǵasynda oqqa ushqan arheologtyń isi boıynsha sotqa deıingi tergeý aıaqtaldy
ASTANA. KAZINFORM – Advokat qańtar oqıǵasy kezinde Almatyda oqqa ushqan arheolog Erlan Jaǵyparovtyń isi boıynsha sotqa deıingi tergeý aıaqtalǵanyn málim etti.
Sáýle Kóbjanova Facebook-tegi jazbasynda sotqa deıingi tergeýdiń aıaqtalǵany týraly habarlama alǵanyn aıtady.
«Tergeý jolyndaǵy barlyq kedergilerge, kúdikti de, oǵan baǵynyshtylar da A-ny búrkemelep kýálik etkenderine qaramastan, Іshki ister mınıstrliginiń áskerı-tergeý departamenti men áskerı prokýratýra ózderin bıikten kórsetti. Aqyry mine is sotqa jetpek», - dep jazdy ol.
Aıta ketý kerek, qaraly qańtar oqıǵasynan keıin bir jyl ótkende Bas prokýror Berik Asylov Májilistiń jalpy otyrysynda qańtar oqıǵasy kezinde qaza tapqan 238 adamnyń qaıtys bolǵanyn resmı málimdedi.
«Shabýyldy toıtarý kezinde, tótenshe jaǵdaı men antıterrorıstik operatsııa barysynda 238 adam qaıtys boldy. Onyń ishinde 41 adam buryn sottalǵan. Qaza bolǵandar sany týraly málimet durys, júrgizilgen tergeý aıasynda muqııat tekserildi», - degen edi sol kúni Berik Asylov Májilis otyrysynda.
Bas prokýrordyń aıtýynsha, qaza tapqandar ishinde 67 adam shabýyldaýshy bolyp tanyldy, ıaǵnı jappaı tártipsizdikke qatysqan kúdiktiler; 142 adam tótenshe jaǵdaı men antıterrorıstik operatsııa rejımin buzýshylar; 4 adam basqa da qylmystar jasaý kezinde mert bolǵan.
«Jalpy, Almaty qalasynda 151 adam qaza boldy. Olardyń kóbi – Prezıdent Rezıdentsııasyn shabýyldaý kezinde qaza tapqan. Adam ólimi taǵy Qyzylorda (26), Shymkent (20) jáne Taraz qalalarynda (17) oryn aldy», - dedi Berik Asylov.
