Qańtar oqıǵasynan keıin joǵalǵan qarýdyń biri Shymkentten tabyldy
ASTANA. KAZINFORM — Qazaqstanda quqyq qorǵaý organdary zańsyz aınalymdaǵy qarý-jaraqty anyqtaý jáne tárkileý jumystaryn jalǵastyryp jatyr. Shymkent pen Petropavl qalalarynda qarý-jaraq jasyrylǵan oryndar tabyldy.
Іshki ister jáne ulttyq qaýipsizdik organdary zańsyz saqtalǵan qarý-jaraq pen oq-dárilerdi, sondaı-aq olar jasyrylǵan oryndardy anyqtaý boıynsha birlesken jumys júrgizip jatyr.
— Shymkent qalasynyń Turan aýdanynda avtomobıl jolynyń janyndaǵy aryqtan qarý-jaraq jasyrylǵan oryn tabyldy. Ol jerden úsh ańshylyq myltyq, sholaq myltyq jáne tapansha tárkilendi. Ańshylyq myltyqtardyń biri 2022 jylǵy Qańtar oqıǵasy kezinde Almatydaǵy qarý-jaraq dúkeninen urlanǵany anyqtaldy, — delingen habarlamada.
Shamamen osy ýaqytta Petropavl qalasyndaǵy ashyq aýmaqtan ańshylyq myltyq, nómirleri óshirilgen eki sholaq myltyq, oq ótpeıtin keýdeshe jáne 27 oq-dári tabyldy.
ІІM zańsyz saqtalǵan qarýdy óz erkimen tapsyrǵan azamattar qylmystyq jáne ákimshilik jaýapkershilikten bosatylatynyn eske saldy.
Sonymen qatar 20 sáýirden bastap jyl sońyna deıin halyqtan zańsyz saqtalǵan atys qarýyn, oq-dáriler men jarylǵysh zattardy satyp alý aktsııasy ótkizilip jatyr. Búginge deıin azamattar shamamen 900 qarý men 6 myńǵa jýyq oq-dárini tapsyrǵan.
Zańsyz aınalymdaǵy qarý-jaraq pen oq-dárilerdi anyqtaý jáne tárkileý jumystary jalǵasady.
Osydan buryn 12 óńirde qarý-jaraqty zańsyz saqtaý faktileri anyqtalǵany týraly jazdyq.
