Qańtar oqıǵasy: Taldyqorǵanda polıtsııa ǵımaratynan qarý urlaǵandar sottaldy

Taldyqorǵan qalalyq sotynda 6 kúdiktige qatysty qarýdy urlaý, zańsyz satyp alý, saqtaý faktisi boıynsha qylmystyq isi qaraldy, dep habarlaıdy QazAqparat tilshisi.

Sotta anyqtalǵandaı, 2022 jyly qańtardyń 5-nen 6-na qaraǵan túni eki er adam Polıtsııa departamentiniń ǵımaratynan atys qarýy men oq-dárilerdi urlap, keıin olardyń biri óziniń eki tanysyn qarý satýǵa kóndirgen. Tanystary qarý men onyń kerek-jaraqtaryn satyp alatyn eki adamdy tabady.

«Osy jyldyń 18 qańtarynda eki sottalýshy satyp alýshymen kezdesip, oǵan 1 mıllıon teńgege 2 avtomat pen patrondary bar karabın satyp alýdy usynǵan. Sol kúni keshke polıtsııa qyzmetkerleri olardy ustady», - delingen qalalyq sot málimetinde.

Sottalýshylar óz kinálaryn tolyq moıyndap, ókinetinderin aıtty. Sot 6 aıyptalýshynyń árqaısysyna 3 jylǵa bas bostandyǵynan aıyrý jazasyn taǵaıyndap, jazalaryn qylmystyq-atqarý júıesiniń ortasha qaýipsiz mekemesinde óteýge úkim shyǵardy.

Úkim zańdy kúshine engen joq.