Sheteldik azamattardy azaptaǵan polıtseıler sottaldy

QONAEV. KAZINFORM – Almaty oblysynda laýazymdyq ókilettikterin asyra paıdalanǵan alty polıtsııa qyzmetkerine qatysty sot úkimi shyqty. 

Almaty oblysy Qarasaı aýdandyq sotynan qyzmeti málim etkendeı, 2022 jyldyń qańtarynda 44 jábirlenýshi, onyń ishinde Ózbekstan, Tájikstan jáne Qyrǵyzstan azamattary polıtsııa basqarmasynyń arnaıy qabyldaǵyshyna ornalastyryldy.

– Sottalýshylar ózderiniń laýazymdyq ókilettikterin paıdalana otyryp, zańǵa qaıshy áreketter jasady, nátıjesinde zardap shekkender azaptaldy, - dep habarlady Qarasaı aýdandyq sotynyń baspasóz qyzmeti. 

Prokýror sýdıadan sottalýshylardy kináli dep tanyp, olardy 3 jylǵa bas bostandyǵynan aıyrýdy surady. 

Al, qorǵaýshy tarap sottalýshylardy aqtaýdy surady.

Sottalýshylardyń kinási kýágerlerdiń aıǵaqtarymen, saraptamalardyń qorytyndylarymen, sotta rastalǵan jáne zerttelgen basqa da dáleldemelermen tolyq dáleldendi.

– Sot úkimimen 6 polıtsııa qyzmetkeri 146-baptyń 1-bóliginde (2023 jylǵy 17 naýryzǵa deıin redaktsııada) jáne QK-niń 362-babynyń 1-bóliginde kózdelgen qylmys jasaǵany úshin kináli dep tanyldy, qylmystyq quqyq buzýshylyqtardyń jıyntyǵy boıynsha QK-niń 58-babynyń 2-bóligine sáıkes árqaısysyna 3 jyl merzimge bas bostandyǵynan aıyrý jazasy taǵaıyndaldy, - delingen habarlamada.

Úkim zańdy kúshine engen joq. 

Aıta keteıik, azaptalǵandardyń arasynda belgili qyrǵyz mýzykanty Vıkram Rýzahýnov ta bar.

Osyǵan deıin Qańtar oqıǵasy boıynsha jetkizilgen azamatty azaptaǵan almatylyq polıtsııa qyzmetkeri sottalǵan edi.

Eske salaıyq, 2023 jyly Almaty oblystyq polıtsııa departamentiniń burynǵy basshysy Serik Kúdebaev bılik pen laýazymdyq ókilettigin asyra paıdalaný jáne azaptaý baptary boıynsha kináli dep tanylyp, 10 jylǵa sottaldy.