Qańtar oqıǵasy kezinde urlanǵan 160 qarý áli de zańsyz aınalymda — ІІM
ASTANA. KAZINFORM — Qazaqstanda jyl basynan beri zańsyz aınalymnan eki myńnan astam qarý tárkilendi. Onyń ishinde Qańtar oqıǵasy kezinde urlanǵan 160 qarý bar. Sonymen qatar polıtsııa toǵyz aıda brakonerlikke qatysty 119 qylmystyq isti sotqa joldap, zańsyz aınalymnan 23 tonnadan astam balyq pen 361 kıik múıizin tárkiledi. Bul týraly ІІM málim etti.
Іshki ister mınıstrligi brakonerlikpen jáne tabıǵı resýrstardy zańsyz ıemdenýmen kúresti jalǵastyryp jatyr.
2026 jyldyń toǵyz aıynda polıtsııa qyzmetkerleri tabıǵatty qorǵaý zańnamasyn buzýǵa qatysty 119 qylmystyq isti sotqa joldady.
Osy kezeńde zańsyz aınalymnan:
-
23 tonnadan astam balyq, onyń ishinde 1,5 tonna bekire tuqymdas balyq;
-
11 kelige jýyq ýyldyryq;
-
361 kıik múıizi;
-
29 shaqyrymǵa jýyq tyıym salynǵan balyq aýlaý tory;
-
345 ańshylyq qarý tárkilendi.
Tabıǵatty qorǵaý zańnamasyn buzǵany úshin 13 200 adam ákimshilik jaýapkershilikke tartyldy.
Máselen, Soltústik Qazaqstan oblysy Aqjar aýdany aýyldarynyń birinde polıtsııa qyzmetkerleri tıisti qujattary joq, bir tonnaǵa jýyq balyq tıegen «Gazel» avtokóligin toqtatty.
Kóliktiń júksalǵyshynan eki qaıyq pen qaıyq motorlary tabyldy. Qazir balyqtyń qaıdan alynǵany jáne ony aýlaýdyń zańdylyǵy anyqtalyp jatyr.
Sondaı-aq Soltústik Qazaqstan oblysy Aqqaıyń aýdanyndaǵy aýyldardyń biriniń mańynda polıtsııa qyzmetkerleri qoryqshymen birlesip, zańsyz ań aýlaý deregin anyqtady.
Avtokólikti tekserý barysynda sibir eliginiń eki ushasy men eki ańshylyq qarý tabyldy. Atalǵan derek boıynsha sotqa deıingi tergep-tekserý bastaldy.
Polıtsııa qyzmetkerleri brakonerlerdi ǵana emes, zańsyz alynǵan tabıǵı resýrstardy tasymaldaýmen, saqtaýmen jáne satýmen aınalysatyn adamdardy da anyqtap jatyr.
Aıta keteıik, buǵan deıin Almatyda travmatıkalyq qarý alyp júrgen 52 jastaǵy turǵyn ustalǵan bolatyn.
