Qańtar oqıǵasy kezinde «Dıkıı Armannyń» toby qansha adamdy qamaýda ustaǵan

ALMATY. KAZINFORM — Sot barysynda Arman Jumageldıev bastaǵan top 2022 jyly qańtar aıy kezinde jasaǵan qylmystarǵa qatysty tolyq derekter aıtyldy.

Дикий Арман
Фото: instagram.com/armandzhumageldiev

Almaty qalasynyń qylmystyq ister jónindegi mamandandyrylǵan aýdanaralyq sotynda Arman Jumageldıevke, Almaty máslıhatynyń burynǵy depýtaty Qaırat Qudaıbergenge, UQK besinshi departamentiniń burynǵy basshysy Rýslan Ysqaqovqa qatysty sot úkimi shyqty.

Sot málimetine sáıkes, 2016 jyly QR UQK 5-shi departamenti bastyǵynyń orynbasary qyzmetin atqarǵan Ysqaqov Jumageldıevti Ulttyq qaýipsizdik organdary tarapynan qamqorlyqqa alýǵa ýáde bergen. Bul kelisimnen keıin Jumageldıev Qazaqstan aýmaǵynda jáne odan tys jerlerde qylmystyq uıymdy qalyptastyrýǵa kirisken.

Jumageldıev Qańtar oqıǵasynan buryn aldyn ala 2021 jyly jeltoqsan aıynda Qazaqstanǵa kelgen. Al 2022 jyly qańtar aıynda jappaı tártipsizdik bastalǵanda «Qazaqstan» qonaq úıinde shtab uıymdastyrǵan Qaırat Qudaıbergennen shaqyrtý alyp, sonda qarýly toptyń is-áreketterin basqaryp otyrǵan.

Sot anyqtaǵandaı, 2022 jyly 5 qańtar kúni Jumageldıev bastaǵan top Respýblıka alańyna eki ret shyqqan. Olar bılikke talap qoıý úshin «Halyqtyq keńes» túrindegi konstıtýtsııalyq emes organ qurýdy josparlaǵan. Keıin Jumageldıev jappaı tártipsizdikke qatysýshylar sanyn kóbeıtý úshin Almaty men Shymkent qalalarynan óz bandasynyń adamdaryn shaqyrǵan.

2022 jyldyń 5 qańtarynan 6-syna qaraǵan túni UQK basshylyǵy ustalǵannan keıin Ysqaqov jappaı tártipsizdik boıynsha jospardyń sátsizdigin túsinip, qylmys izderin jasyrýǵa kirisedi. Almaty qalasyndaǵy jaǵdaıdy turaqtandyrý syltaýymen ol Jumaǵeldıevke adamdardy urlap, olardy «Qazaqstan» jáne «The Ritz Carlton Almaty» qonaq úılerinde ustaýǵa nusqaý berdi.

Osylaısha banda músheleri barlyǵy 34 jábirlenýshini urlap, uryp-soqqan. Mysaly, «The Ritz Carlton Almaty» qonaq úıiniń janynda Jumageldıevtiń qylmystyq tobynyń 15 múshesi ótip bara jatqan kólikti toqtatyp, ondaǵy 5 azamatty ustap alǵan. Keıin jábirlenýshilerdi qonaq úıdiń jerasty parkıngine májbúrlep aparyp, ish kıimderi qalǵansha sheshindirip, uryp-soqqan. Banda músheleri jábirlenýshilerdi jappaı tártipsizdikter men bótenniń múlkin urlaýǵa qatysqanyn moıyndaýǵa májbúrlegen.

Sonymen qatar Jumageldıev ózi uıymdastyrǵan qylmystardyń izderin jasyrý úshin Almaty qalasy TJD Órt sóndirý mashınasyn qaıtaryp, 12 qalalyq aýrýhanany kúzetke alǵan, sondaı-aq Almaty qalasynyń turǵyndaryna azyq-túlik taratýǵa bastamashy boldy.

— Іs qatysýshylarynyń atalǵan qylmystyq áreketteri kýágerlerdiń turaqty aıǵaqtarymen, saraptamalarmen, sotta zerttelgen beıne dáleldemelermen rastalady, — dep habarlady sottan.

Sot úkimimen Jumageldıev QR QK-niń 262-baby 1-bóligi, 268-baby 1-bóligi, 272-baby 1-bóligi, 272-baby 2-bóligi, 28 baby 3-bóligi, 125-baby 3-bóligi, 1-tarmaǵy, 126-baby 3-bóligi, 1-tarmaǵy boıynsha kináli dep tanylyp, oǵan 20 jylǵa bas bostandyǵynan aıyrý jazasy taǵaıyndaldy.

R. Ysqaqov QR QK-niń 262-baby 3-bóligi, 272-baby 1-bóligi, 362-baby 4-bóligi, 3-tarmaǵy, 28-baby 3-bóligi, 125-baby 3-bóligi, 1-tarmaǵy, 28-baby 3-bóligi, 126-baby 3-bóligi 1-tarmaǵy, 268-baby 3-bóligi boıynsha kináli dep tanylyp, oǵan 15,6 jylǵa bas bostandyǵynan aıyrý jazasy taǵaıyndaldy.

Q.Qudaıbergen QR QK-niń 272-baby 1,2-bólikteri, 126-baby 2-bóligi, 1 jáne 7-tarmaqtary boıynsha kináli dep tanylyp, oǵan 8 jyl bas bostandyǵynan aıyrý jazasy taǵaıyndaldy.

Jappaı tártipsizdikterdiń basqa qatysýshylaryna — Jumageldıevtiń qylmystyq tobynyń múshelerine (barlyǵy 13 adam) 10 jyldan 15,5 jylǵa deıin bas bostandyǵynan aıyrý jazasy taǵaıyndaldy.

Qylmystyq toptyń quramyna kirmeıtin jappaı tártipsizdikterdiń basqa qatysýshylaryna 1,5 jyldan 7 jylǵa deıin bas bostandyǵynan aıyrý jazasy taǵaıyndaldy.

Úkim zańdy kúshine engen joq.

Eske salaıyq, 2023 jyly qyrkúıek aıynda Almaty mańyndaǵy №72 túzeý mekemesiniń tergeý ızolıatorynda máslıhattyń eks-depýtaty Qaırat Qudaıbergen men Arman Jumageldıevke qatysty sot protsesi bastaldy.

Сейчас читают