Qańtar oqıǵasy kezinde 4 jasar Aıkórkemdi óltirdi dep aıyptalǵan Arman Juman 7 jylǵa sottaldy
ALMATY. KAZINFORM – QR Áskerı sotynyń qylmystyq ister jónindegi sot alqasy qarý qoldaný arqyly bılikti asyra paıdalaný boıynsha (QK 451-baby 2-bóliginiń 1-tarmaǵymen) aıyptalǵan áskerı qyzmetshi A.Jumanǵa qatysty qylmystyq isti apellıatsııalyq tártipte qaıta qarady.
QR Áskerı sotynyń málimetinshe, buǵan deıin birinshi satydaǵy sot áskerı qyzmetshiniń is-áreketinde qylmystyq quqyq buzýshylyq quramynyń bolmaýyna baılanysty ony aqtaǵan. Qylmystyq is jabyq sot otyrysynda «qupııa» belgisimen qaralǵan.
Apellıatsııalyq sot alqasy jábirlenýshi taraptyń shaǵymdary men prokýrordyń narazylyǵy negizinde isti qaıta qarady. Sot alqasymen anyqtalǵany: 2022 jylǵy 7 qańtarda saǵat 19.30 shamasynda sottalýshy A.Juman blok-beketinde bola tura, onyń qaramaǵyndaǵy áskerı qyzmetshilerge blok-beketine jaqyndap kele jatqan avtokólikke oq atý týraly zańsyz buıryq bergen. Nátıjesinde alǵan oq jaraqaty saldarynan jas bala (2017 jyly týǵan Aıkórkem Meldehan) qaıtys bolyp, al kámeletke tolmaǵanǵa (2006 jyly týǵan J.Meldehan) 5 oq jaraqatynan densaýlyǵyna aýyr zııan keltirilgen.
«Sottalýshynyń kinási is boıynsha jınalǵan dáleldemelermen, ıaǵnı jábirlenýshiler men kýágerlerdiń aıǵaqtarymen, sot saraptamalarynyń qorytyndylary jáne zattaı dáleldemelerimen dáleldendi. QR Áskerı sotynyń sot alqasy aqtaý úkiminiń kúshin joıyp, jańa aıyptaý úkimin shyǵardy. Oǵan sáıkes QK-niń 451-baby 2-bóliginiń 1-tarmaǵy boıynsha A.Juman kináli dep tanylyp, bas bostandyǵynan aıyrylyp, 7 jylǵa sottaldy», - dep QR Áskerı sotynyń baspasóz qyzmeti.
Sonymen qatar sot alqasy QR Qorǵanys mınıstriniń atyna áskerı qyzmetshilerdiń jol bergen zań buzýshylyqtary, sondaı-aq olardy joıý jáne odan ári boldyrmaý jóninde sharalar qabyldaý úshin qylmys jasaýǵa yqpal etken sebepter men jaǵdaılar týraly jekeshe qaýly shyǵardy.
Apellıatsııalyq úkim zańdy kúshine endi.
Eske salsaq, ótken jyly qarasha aıynda Almaty garnızony áskerı soty Qańtarda kishkentaı Aıkórkemdi óltirdi dep aıyptalǵan Arman Jumanǵa úkim shyǵaryp, ony aqtaǵan edi.
