Qańtar oqıǵasy boıynsha jetkizilgen azamatty azaptaǵan polıtsııa qyzmetkeri sottaldy

ASTANA. KAZINFORM – Almaty qalasynyń Qylmystyq ister jónindegi mamandandyrylǵan aýdanaralyq soty kináni moıyndaý týraly protsestik kelisiminiń negizinde Qańtar oqıǵalary kezinde jetkizilgen adamǵa azaptaýdy qoldanǵany úshin (QK-niń 146-baby) aıyptaý úkimin shyǵardy.

Qylmystyq isti Almaty qalasynyń arnaıy prokýrorlary tergep-tekserdi.

Prokýrorlar 2022 jylǵy 8 qańtarda Almaly aýdanynyń Polıtsııa basqarmasynda kináli polıtsııa qyzmetkeriniń jetkizilgen azamatqa qatysty azaptaýlardy qoldanǵanyn dáleldedi.

«Polıtsııa qyzmetkeriniń quqyqqa qarsy áreketteriniń nátıjesinde jábirlenýshige dene azaby keltirilgen.

Kináni moıyndaý týraly protsestik kelisimin eskere otyryp, sot úkimimen sottalýshyǵa arnaıy ataǵynan jáne memlekettik qyzmette jumys isteý quqyǵynan aıyra otyryp, 2 jyl 6 aı merzimge bas bostandyǵyn shekteý túrindegi jaza taǵaıyndaldy», — dep jazdy Bas prokýratýradan.

Úkim zańdy kúshine endi.