Qańtar oqıǵasy: azaptaý isi boıynsha sottalǵan Ábilbekov qamaýda qaıda otyr
ALMATY. KAZINFORM — Almaty polıtsııa departamenti bastyǵynyń burynǵy orynbasary Berik Ábilbekov 2022 jylǵy qańtarda Qosmambet aýylyndaǵy arnaıy qabyldaý ızolıatorynda azamattardy azaptaǵany úshin sottalǵan. Ol qazir jazasyn Taldyqorǵanda ótep jatyr.
Qazaqstan Respýblıkasynyń Bas prokýratýrasy agenttik saýalyna bergen jaýabynda, Ábilbekov ІІM Qylmystyq-atqarý júıesi komıtetiniń Taldyqorǵanda ornalasqan № 71 mekemesinde qamaýda otyrǵanyn málimdedi.
Qadaǵalaýshy organnyń dereginshe, sottalýshyǵa qatysty qamaý jaǵdaıyn jeńildetý, merzimin qysqartý, raqymshylyq nemese úkimdi basqa jolmen jumsartý qoldaný máselesi qaralmaǵan.
— Qazaqstan Respýblıkasynyń Qylmystyq-protsestik kodeksiniń 476-babyna sáıkes, izgilendirý aktilerin qoldaný sottyń aıryqsha quzyretine jatady. Sondyqtan Ábilbekov B.K. mundaı ótinish bildirgen jaǵdaıda, olar zańda belgilengen tártippen sotta qaralady, — delingen Bas prokýratýra jaýabynda.
2025 jylǵy qańtarda sot Berik Ábilbekovti úsh jylǵa bas bostandyǵynan aıyrý týraly úkim shyǵardy.
Bul is boıynsha barlyǵy polıtsııanyń alty qyzmetkeri kináli dep tanyldy. Olar QK 146-babynyń 1-bóligi (2023 jylǵy 17 naýryzǵa deıingi redaktsııa) jáne 362-babynyń 1-bóligi boıynsha sottaldy. Qylmys jıyntyǵy negizinde (QK 58-babynyń 2-bóligi) árqaısysyna úsh jyl bas bostandyǵynan aıyrý jazasy taǵaıyndaldy.
Sondaı-aq, olardyń memlekettik qyzmette laýazym atqarý jáne arnaıy ataqtar ıelený quqyǵy alynǵan.
Іs boıynsha jábirlenýshilerdiń arasynda qyrǵyzdyń belgili mýzykanty Vıkram Rýzahýnov ta bolǵan.