Qańtar oqıǵalarynda urlanǵan qarý-jaraqtyń qanshasy tabyldy

NUR-SULTAN. QazAqparat – El azamattary qańtar oqıǵasy kezinde urlanǵan 68 qarýdy óz erikterimen tapsyrdy. Bul týraly QR ІІM Tergeý departamentiniń bastyǵy Sanjar Ádilov aıtty, dep habarlaıdy QazAqparat tilshisi.

«Urlanǵan qarýdy izdeý men alý boıynsha is-sharalar jalǵasýda. Búgingi tańda alynǵan qarýdyń jalpy sany 967 birlikti jáne 19 myńnan astam oq-dárini quraıdy. Mysaly, Taldyqorǵanda 5 qańtarda jappaı tártipsizdikterge belendi qatysqan, qalalyq polıtsııa basqarmasynyń ǵımaratynan 7 Makarov tapanshasy men 1 Kalashnıkov avtomatyn urlaǵan osy qalanyń úsh turǵyny ustaldy. Urlanǵan qarý tárkilendi. Kúdikti adamdar sot sanktsııasymen qamaýǵa alyndy. Jambyl oblysynda Taraz qalasynyń turǵyny ustaldy. Onyń garajynda 4 avtomat, 8 jaraqattaıtyn tapansha, 1 gazdy tapansha, olardyń oqsalǵyshtary, 945 birlik oq-dári jáne sýyq qarý tabylyp alyndy. Qarýdyń 68 birligi erikti túrde tapsyryldy. Azamattardy taýyp alǵan qarýdy erikti tapsyrýǵa taǵy da shaqyramyn. Ol ákimshilik te qylmystyq ta jaýapkershilikti týyndatpaıdy», - dedi ol Ortalyq kommýnıkatsııalar qyzmetindegi brıfıng barysynda.

onyń dereginshe, qabyldanǵan is-sharalar nátıjesinde azamattar men bıznes sýbektileriniń jalpy somasy 110 mln teńgege baǵalanatyn urlanǵan múlki, onyń ishinde 10 avtomashına, turmystyq tehnıkanyń 301 birligi, 188 birlik zergerlik buıym, 250 uıaly telefon, 16 mln teńge, kıimniń 472 birligi alynǵan.

«Kúdikti adamdardyń ómir salty men jeke basyn zerdeleý olardyń úshten biri – 113 buryn sottalǵan, onyń ishinde kisi óltirý, zorlaý, qaraqshylyq úshin, al 8-i urlyq, tonaý sııaqty qylmystar úshin respýblıkalyq izdestirýde bolǵanyn kórsetedi», - dedi Sanjar Ádilov.