Qańtar oqıǵalarynan keıin jalǵan aqparat taratý jıilep ketti - ІІM
«Qańtar oqıǵalarynan keıin azamattardyń qoǵamdyq sanasyn baqylaý úshin aqparattyq soǵys bastaldy. Áleýmettik jeliler arqyly kórineý jalǵan aqparatty taratý jaǵdaılary jıiledi. Feık habarlamalar dep atalyp ketkenderdiń negizgi úlesi shetelden keledi. Búgingi tańda áleýmettik jelilerden shetelde tirkelgen 50 akkaýnt anyqtaldy», - dedi ol Ortalyq kommýnıkatsııalar qyzmetindegi brıfıng barysynda.
Onyń dereginshe, QR QK-niń 274-baby (kórineý jalǵan aqparatty taratý) boıynsha 13 qylmystyq is tirkeldi. Olar boıynsha muqııat tergeý júrgizilýde. Eki adam qamaýǵa, taǵy ekeýi úıqamaqqa alyndy.
«Mysaly, jappaı tártipsizdikter kezinde Qostanaı qalasynda «Telegram» messendjerinde óz atynan SOBR qyzmetkerleri ereýilshiler jaǵyna shyqqany týraly jalǵan aqparat taratqan azamat ustaldy. Sonymen qatar qyzmetker atynan «olar eshkimdi ustamaıtyny, barlyǵyn ereýilge shyǵýǵa shaqyrý» týraly eki mátindik habarlama salǵan. Kelesi oqıǵada, Aqmola oblysynyń turǵyny jappaı tártipsizdikterden soń 2022 jylǵy 10 qańtarda eldegi jaǵdaıdy ýshyqtyrý maqsatynda óziniń «Facebook» paraqshasyna «polıtsııa qyzmetkerlerin óltirýge úgitteıtin» jazba engizgen. Azamattardy arandatýǵa kónbeýge jáne tekserilgen aqparat quraldaryna ǵana senýge taǵy da shaqyramyz», - dedi Sanjar Ádilov.
