Qańtar oqıǵalarynan keıin kósheler men qoǵamdyq oryndardy polıtsııa qadaǵalaıdy
«Qańtardaǵy qaıǵyly oqıǵalardan keıin Іshki ister mınıstrligi quqyq qorǵaý jáne arnaıy organdarmen birlesip jumys istedi jáne eldegi jaǵdaı turaqtandy. Sonymen birge, tótenshe jaǵdaı rejımi joıylǵannan keıin, 19 qańtardan bastap elimizdiń barlyq óńirlerinde «Quqyqtyq tártip» jedel-aldyn alý sharasy ótip jatyr. Onyń maqsaty – eldegi jaǵdaıdy qalpyna keltirý, zańdylyq pen quqyqtyq tártipti qamtamasyz etý jáne tótenshe jaǵdaı saldaryn joıý boıynsha sharalar qabyldaý. Іshki ister organdarynyń jeke quramy qoǵamdyq tártipti saqtaý men azamattarymyzdyń qaýipsizdigin qamtamasyz etedi», - dedi QR ІІM Ákimshilik polıtsııa komıtetiniń basqarma bastyǵy Baǵlanbek Aıtpaev mınıstrlikte ótken brıfıngte.
Spıkerdiń aıtýynsha, qoǵamdyq oryndar men kóshelerdi jáne halyq kóp jınalatyn oryndardy patrýldeý kúsheıtildi. Aýlalardy aralaý, jaldamaly, ıesiz qalǵan úılerdi, saıajaı men ózge de nysandar jiti tekseriledi.
«Aralaý kezinde dúkenderden urlanǵan qarýdy, oq-dáriler men basqa da zattardy tárkileýge jáne kóshi-qon zańnamasyn buzǵan sheteldik azamattardy tabýǵa erekshe nazar aýdarylady», - dep túsindirdi B. Aıtpaev.
