Qańtar oqıǵalary: Qarý-jaraqty óz erkimen tapsyrǵandar jaýapkershilikten bosatylady

NUR-SULTAN. QazAqparat – Atys qarýyn, oq-dáriler men jarylǵysh zattardy saqtaǵandar olardy erikti túrde tapsyrsa jáne áreketterinde basqa qylmys quramy bolmasa, qylmystyq jaýapkerishilikten bosatylady. Bul týraly qańtar oqıǵasyna qatysty baspasóz máslıhatynda QR Bas prokýratýrasy Qylmystyq qýdalaý qyzmeti bastyǵynyń orynbasary Eldos Qılymjanov aıtty, dep habarlaıdy QazAqparat.

«Bas prokýratýra qańtar oqıǵalaryna qatysty BAQ pen áleýmettik jelilerdegi jarııalanymdarǵa monıtorıng júrgizedi. Azamattar oqıǵanyń mán-jaıyn durys túsinbeı, jarııalap jiberý jaǵdaılary da jıi kezdesýde. YouTube jelisinde T. esimdi áıel onyń jubaıyn qylmystyq jaýapqa tartý týraly vıdeo jarııalady. Atap aıtqanda, ol polıtsııa qyzmetkerleri áreketiniń zańdylyǵy máselesin kóterýde. Óıtkeni onyń jubaıy óz erkimen qarýdy tapsyrǵan. Bul fakti boıynsha sotqa deıingi tergeýdiń keıbir málimetterin habarlaıyn. Osy áıeldiń jubaıy 6 qańtar kúni adamdar tobynda aýyr qylmys jasady dep kúdiktelýde. Jambyl oblysy Polıtsııa departamentiniń ǵımaratyna kirip, ol jaqtan 3 Kalashnıkov avtomaty men tapansha urlap áketken», - dedi E. Qılymjanov Ortalyq kommýnıkatsııalar qyzmetinde.

Onyń áreketteri QR Qylmystyq kodeksiniń 291-babymen qarýdy urlaý retinde saralanady. Kórsetilgen qylmys sanaty boıynsha qylmystyq jaýaptan bosatý kózdelmegen.

«Esterińizge sala keteıik, tulǵalar atys qarýyn, oq-dárileri men jarylǵysh zattardy saqtaǵany úshin ǵana, eger olar erikti túrde tapsyrylsa jáne áreketterinde basqa qylmys quramy bolmasa, qylmystyq jaýapkerishilikten bosatylady», - dedi Eldos Qılymjanov.

Aıta keteıik, qazir qańtar oqıǵalaryna qatysty sotqa deıingi 3 666 tergep-tekserý isi bar. 162 aıyptalýshyǵa qatysty 101 qylmystyq is sotqa joldandy jáne 62 adam sottaldy.