Qańtar-naýryzda Qazaqstan ekonomıkasynyń ósý qarqyny 4,4 paıyzǵa jedeldedi

NUR-SULTAN. QazAqparat – Qańtar-naýryzda Qazaqstan ekonomıkasynyń ósý qarqyny 4,4 paıyzǵa jedeldedi. Bul týraly Úkimet otyrysynda QR Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Osy jylǵy qańtar-naýryz aılarynda Qazaqstan ekonomıkasynyń ósý qarqyny 4,4 paıyzǵa deıin jedeldedi. Atalǵan esepti kezeńde negizgi trendter boıynsha naqty sektor ósimniń jedeldeýi, eksport kóleminiń údemeli ulǵaıýy, qyzmet kórsetý sektoryndaǵy turaqty dınamıka baıqalýda. Naqty sektordaǵy ósim 5,9 paıyzdy qurady. Qyzmet kórsetý salasynda iskerlik belsendilik 2,8 paıyzǵa deıin ulǵaıdy», - dedi mınıstr.

Onyń dereginshe, salalar arasynda kólik jáne qoımalaý, qurylys, saýda, sýmen jabdyqtaý, óńdeý ónerkásibi, aqparat jáne baılanys, taý-ken óndirý ónerkásibi, aýyl sharýashylyǵy oń ósim kórsetip otyr.

«Negizgi kapıtalǵa salynǵan ınvestıtsııalardyń ósý qarqyny 1,5 paıyzdy qurady. Taý-ken óndirý ónerkásibin esepke almaǵanda negizgi kapıtalǵa salynǵan ınvestıtsııalardyń ósý qarqyny 0,6 paıyz boldy. Investıtsııalar qurylys salasynda – 2,2 esege, bilim berýde – 2,2 esege, memlekettik basqarý; áleýmettik qamsyzdandyrýda 78,5 paıyzǵa ósti», - dedi Álibek Qýantyrov.

Óńirler arasynda eń joǵarǵy kórsetkish Shymkent qalasynda, sondaı-aq Aqmola jáne Pavlodar oblystarynda baıqalǵan.