Qańtar-naýryzda 23 mln tonna munaı men gaz kondensaty óndirildi
NUR-SULTAN. QazAqparat - 2019 jylǵy qańtar-naýryzda ónerkásiptik óndiristiń ındeksi 103,2 paıyzdy qurady. Mundaı málimetti QR UEM Statıstıka komıteti jarııa etti, dep habarlaıdy QazAqparat tilshisi.
Vedomstvo málimetinshe, 2019 jylǵy qańtar-naýryzda 2018 jyldyń qańtar-naýryzymen salystyrǵanda shıki munaı, tabıǵı gaz jáne metall kenderiniń óndirisi ulǵaıdy. Tamaq, sýsyn ónimderi, munaı óńdeý ónimderi, hımııalyq ónerkásip ónimderi, rezeńke jáne plastmassa buıymdary óndirisi jáne mashına jasaý ónimderi óndirisiniń kólemi ósti. Sonymen birge, temeki buıymdary jáne qara metallýrgııa ónimderiniń óndirisi tómendedi. Ónerkásiptik ónimderdiń óndiris kóleminiń ósýi respýblıkanyń 13 óńirinde baıqaldy.
Osy jyldyń úsh aıynda munaı, gaz kondensatyn qosa alǵanda 23 mln, mys kenderi 27,3 mln, un 1 mln, benzın 0,9 mln, dızel otyny 1,1 mln, portlandtsement 1,5 mln, jazyq ılek 0,4 mln, tazartylǵan mys 0,1 mln tonna, elektr energııasy 28,1 mlrd kVt. saǵat óndirildi.
