Qańtar. Memlekettik tóńkeris. Qalaı bolyp edi
ASTANA. KAZINFORM — QR Prezıdenti Teleradıokesheni Qańtar oqıǵasynyń úsh jyldyǵyna arnalǵan derekti fılm túsirdi. Fılm memlekettik tóńkeris áreketiniń hronologııasyn baıandaıdy jáne «Úsh jylda Qazaqstan qoǵamy qalaı ózgerdi?» degen basty suraqqa jaýap beredi. Bul týraly Kazinform agenttigi habarlaıdy.
Qańtar uıymdastyrýshylary qatty qatelesti. Olar bılikti basyp alýdy josparlady, biraq shenderi men ataqtaryna qaramastan temir torǵa jabyldy. Olar reformalardyń keri ketýin oılady, alaıda Qazaqstandaǵy ózgerister tek qarqyn aldy.
Derekti fılmde memlekettik tóńkeris uıymdastyrýshylarynyń josparlary men shemalarynyń qalaı daıyndalǵany, arandatýshylar, úılestirýshiler jáne jaýyngerlerdiń qalaı ázirlengeni, qarý-jaraq, kólik jáne baılanys quraldarynyń qalaı satyp alynǵany kúni men saǵatyna deıin egjeı-tegjeıli kórsetiledi. Barlyq jaǵdaılar men faktiler, qujattar, foto jáne beınematerıaldar, kýágerlerdiń málimetteri muqııat zerttelip, taldanǵan.
Memlekettiń daǵdarysty oqshaýlaý men joıý, eldegi zań men tártipti qalpyna keltirý boıynsha shuǵyl qabyldanǵan sharalary kórsetiledi.
Eń bastysy, Qazaqstan Prezıdenti odan ári batyl reformalardy júzege asyrý úshin halyqtyń qoldaýyn aldy, bul tóńkeris uıymdastyrýshylaryna unamady. Derekti fılmde Qazaqstannyń aýqymdy transformatsııasynyń negizgi kezeńderi hronologııalyq tártippen kórsetilgen.
Derekti fılm búgin Jibek Joly telearnasynda saǵat 19:05-te kórsetiledi.
Eske sala keteıik, buǵan deıin Qańtar oqıǵa qalaı órbigenin jáne «Dıkıı Arman» isin tergeý qaı kezeńde turǵanyn jazǵan bolatynbyz.