Qańtar-maýsym Qazaqstan halqy 124 myń adamǵa artty - Statıstıka
ASTANA. QazAqparat - Aǵymdaǵy jyldyń qańtar-maýsymynda Qazaqstan halqy 124 myń adamǵa artty. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Ulttyq ekonomıka mınıstrligi Statıstıka komıtetiniń tóraǵasy Álıhan Smaıylov málim etti.
«2014 jyldyń 1 shildesinde elimizdegi halyq sany 17 284,9 myń adamdy qurady. Onyń ishinde qalalyqtar - 9 523,1 myń (55,1%), aýyldyqtar - 7 761,8 myń adamdy (44,9%). 2014 jylǵy qańtar-maýsymda jalpy elimizde halyq sany 124,1 myń adamǵa nemese 0,7 paıyzǵa ósti, 2013 jylǵy 1 shildemen salystyrǵanda halyq sany 256,3 myń adamǵa nemese 1,5 paıyzǵa artty», - dedi ol.
Onyń sózine qaraǵanda, AHAT organdary usynǵan azamattyq hal aktileri jazbalaryn óńdeý nátıjesinde 2014 jyldyń qańtar-maýsymda dúnıege kelgender sany 193,3 myń adamdy qurap, 2013 jylǵy qańtar-maýsymǵa qaraǵanda 4,7 myń adamǵa nemese 2,5 paıyzǵa artqan.
Sonymen qatar komıtet basshysynyń aıtýynsha, qarastyrylyp otyrǵan kezeńde qaıtys bolǵandar sany 66,9 myń adamdy qurap, 2013 jyldyń qańtar-maýsymyna qaraǵanda 3,5 myń adamǵa nemese 5 paıyzǵa azaıǵan.
