Qańtar-mamyr aılarynda elimizde 33,1 mln. tonna munaı óndirildi
ASTANA. 29 maýsym. QazAqparat -Respýblıkamyzdyń munaı óndirýshi kompanııalary 2012 jyldyń qańtar-mamyr aılary aralyǵynda, gaz kondensatyn qosa alǵanda 33,1 mln. tonna munaı óndirgen.
Bul týraly «Munaı jáne gaz aqparattyq taldaý ortalyǵy» AQ-nyń keltirgen derekterinde habarlandy.
Taldaý ortalyǵynyń málimetine sáıkes, elimizdegi munaı óndirýdiń negizgi ósimin «Qarashyǵanaq Petroleým Opereıtıng B.V.», «Qarajanbasmunaı» AQ, «Qazaqoıl Aqtóbe» JShS, «Qazgermunaı» BK JShS, «Petro Qazaqstan Qumkól Resorsız» AQ, «Mańǵystaýmunaıgaz» AQ kompanııalary qamtamasyz etken.
Al jalpy budan buryn da belgili bolǵandaı elimizde 2012 jyly josparlanyp otyrǵan munaı óndirý kólemi 81 mln. tonnany quraıdy. Bul rette Qazaqstan úshin erekshe mańyzy bar jobalar Teńiz jáne Qarashyǵanaq kenishterin damytý bolyp otyr.
